【深圳一日遊2026】即日來回行程推薦 | 50大景點、美食、按摩好去處及4大行程路線推介

想趁週末快閃深圳一日遊，但深圳地方太大，好去處多到眼花撩亂，唔知點樣計劃行程？

小編為你整合最新最齊嘅【深圳一日遊】攻略懶人包，由交通、電子支付、上網等行前準備，到各大深圳必去景點、深圳人氣美食、大型商場、深圳按摩水療，全部一次過介紹晒！

本文更附上親子、情侶、購物及文青4大主題路線，無論你係邊種類型嘅旅人，跟住玩就無錯！

深圳一日遊：行程路線懶人包

深圳好玩好食嘅地方咁多，一日時間點樣安排先最充實？

唔使煩，小編已經根據唔同旅伴同主題，為你度身訂造咗4條精選嘅一日遊路線，無論你係同屋企人、另一半、閨密定係自己一個去，都可以跟住個plan玩，輕輕鬆鬆玩轉深圳一日遊！

親子放電路線 (動物園/室內樂園/親子餐廳)

呢條路線專為有小朋友嘅家庭而設，由朝玩到晚，保證小朋友可以盡情放電，返到屋企即刻瞓着！

• 上午： 前往 深圳野生動物園，同各種可愛動物近距離接觸，觀賞精彩表演。
• 中午： 到寶安區前海HOP天地嘅 TIAMO甜慕親子餐廳 食晏，小朋友可以喺遊樂區玩，大人就可以輕鬆食飯。
• 下午： 直接喺樓下嘅 HOP-DX潮玩運動街區 或去附近商場嘅 Lollypet萌寵樂園，歎住冷氣繼續玩。
• 晚上： 喺商場食埋晚飯，再心滿意足返香港。

情侶拍拖路線 (打卡點/主題樂園/按摩)

想同另一半過一個浪漫又好玩嘅週末？呢條路線有齊打卡靚景、刺激玩樂同舒適享受，絕對可以為感情升溫。

• 上午： 到南山區嘅 華僑城創意文化園 行下文創小店，影下文青相。
• 中午： 喺創意園內搵間特色Cafe食個Lunch。
• 下午： 去寶安區 歡樂港灣，喺海邊散步，等到黃昏時份再登上「灣區之光」摩天輪，欣賞浪漫日落同夜景。
• 晚上： 喺歡樂港灣食完晚餐後，去福田區嘅 水立方 或 湯崎 享受一個舒適嘅按摩或水療，消除一日疲勞。

購物掃貨路線 (Costco/山姆/大型商場)

呢條路線嘅唯一目標就係「買」！帶定個大篋，準備好銀彈，由朝掃到晚，將所有心水貨品同平貨帶晒返香港！

• 上午： 直衝龍華區 Costco 或福田區 山姆超市，主攻大型包裝食品、家品同特價貨。
• 中午： 就喺超市內嘅熟食區快速解決午餐，爭取時間繼續掃貨。
• 下午： 轉場去市中心嘅大型商場，例如羅湖 萬象城 主攻名牌，或福田 CoCo Park 行潮流服飾。
• 晚上： 喺商場食返餐好嘅，例如豪華 深圳酒店自助餐 慰勞自己，再買埋 鮑師傅糕點 做手信。

文青慢活路線 (創意園/古城/書店)

唔鍾意人迫人，想體驗深圳嘅另一面？呢條文青路線帶你遊走古城、逛創意市集、打書釘，享受一個充滿文化氣息嘅慢活週末。

• 上午： 前往龍崗區 大芬油畫村，欣賞琳瑯滿目嘅畫作，感受藝術氛圍，甚至可以參加一個速成油畫體驗班。
• 中午： 到南山區 南頭古城，喺活化咗嘅古城中穿梭，搵間有格調嘅餐廳食晏。
• 下午： 喺古城入面繼續探索，逛下獨立書店、文創小店，或者去福田區嘅 深圳博物館 了解城市歷史。
• 晚上： 去福田 水圍1368文化街，感受由舊村落改造而成嘅彩色街區，喺特色酒吧或餐廳享受一個悠閒嘅晚上。

深圳一日遊【室內玩樂及運動場館】

深圳唔止多商場行，近年仲開咗好多超大型嘅室內運動同遊樂場館，最啱怕曬又想出身汗嘅朋友！

呢啲場館集合多種新潮運動同刺激遊戲，無論係一大班朋友去比賽，定係一家大細親子放電，都可以玩足全日。

一票任玩，冷氣開放，絕對係落雨天或炎炎夏日嘅最佳去處。

HOP-DX潮玩運動街區

位於寶安區前海HOP天地嘅HOP-DX潮玩運動街區，面積足足有16萬呎，超過100個遊樂項目任你玩！

場內分為運動館、電玩城同親子區三大主題，有深圳最大規模嘅室內溜冰場、9洞迷你高爾夫、保齡球賽道，仲有大量街機、體感遊戲同藝術打卡位，設施超豐富，玩完成日都唔會捨得走！

👉🏻 按此預訂即享優惠

• 地址：深圳市寶安區前海HOP天地B1層
• 交通：深圳地鐵5號線寶華站B2出口
• 營業時間：10:00 – 24:00

就好潮玩

「就好潮玩」係一個大型綜合運動館，分為卡丁車俱樂部同潮玩館兩大場館，集結咗超過30種刺激好玩嘅遊樂設施。

你可以喺度玩高難度射箭、VR體驗、跳舞機，仲可以挑戰離地約2米嘅空中繩網陣。呢度將運動同科技完美結合，最啱約埋三五知己嚟一較高下，放足全日電！

👉🏻 按此預訂即享優惠

• 地址：深圳市寶安區西鄉街道坪洲海城路寶安大仟裡購物中心B1層
• 交通：深圳地鐵1號綫坪洲站A出口
• 營業時間：10:00 – 22:00

Gjump運動樂園

Gjump運動樂園係一個超大空間嘅室內運動樂園，以彈床為主題，擁有超過30個娛樂運動項目。

除咗自由蹦床區，仲有刺激嘅魔鬼滑梯、空中飛人、攀石牆同梅花樁等挑戰。

無論大人定細路，都可以喺呢度盡情彈跳，揮灑汗水，係一個極佳嘅解壓同放電場所。

👉🏻 按此預訂即享優惠

• 地址：深圳市福田區皇崗路5001號深業上城T2棟3樓
• 交通：深圳地鐵10號線冬瓜嶺站
• 營業時間：10:00 – 22:00

DA浪玩家運動街區

位於龍華區嘅DA浪玩家運動街區，佔地3萬呎，係一個主打「運動潮玩」嘅室內樂園。

場内匯集咗超過30種新奇好玩嘅項目，包括專業賽道嘅保齡球場、超大旱冰場、碰碰車、PS4遊戲區，仲有各種射擊同體感遊戲，一票暢玩，不限次數，最適合假期約會或者朋友聚會。

👉🏻 按此預訂即享優惠

• 地址：深圳市龍華區後浪新天地購物中心L4層L4-01號
• 交通：深圳地鐵4號線/6號線紅山站
• 營業時間：10:00 – 23:00

卡魯冰雪世界

想喺炎熱嘅深圳感受冰天雪地？嚟卡魯冰雪世界就冇錯！

呢個係深圳最大嘅室內滑雪場，佔地約12,000平方米，採用模擬造雪技術，將溫度維持喺-5℃左右。

場內有寬闊嘅滑雪道，非常適合滑雪新手體驗。除咗滑雪，仲有娛雪區，提供雪圈滑坡、螺旋滑梯等設施，親子同遊一樣咁開心。

👉🏻 按此預訂即享優惠

• 地址：深圳市龍華區高爾夫大道15號觀瀾湖生態運動公社
• 交通：深圳地鐵4號線觀瀾湖站A出口
• 開放時間：設有不同時段場次，一般為10:00 – 20:00

Lollypet 萌寵樂園

位於商場內嘅Lollypet萌寵樂園，係一個可以歎住冷氣同小動物近距離接觸嘅好地方。

樂園有超過20種罕見嘅小動物，包括草泥馬、水豚、梅花鹿、小浣熊等。所有動物都經過嚴格管理，環境乾淨衛生，遊客可以買飼料餵飼佢哋，非常適合親子家庭，或者鍾意小動物嘅你。

👉🏻 按此預訂即享優惠

• 地址：羅湖萬象食家店、龍崗萬科里店等多家分店
• 交通：(羅湖店) 深圳地鐵7號線筍崗站
• 營業時間：10:00 – 22:00

特色叢林高卡車俱樂部

想體驗速度與激情？深圳特色叢林高卡車俱樂部係國內第一個叢林卡丁車項目，賽道全長500米，穿梭喺叢林之間，極富挑戰性。

場館會提供專業頭盔等安全裝備，開車前亦有教練耐心講解，即使係新手都唔使擔心。賽車位於世界之窗停車場內，玩完仲可以順便去埋世界之窗。

👉🏻 按此預訂即享優惠

• 地址：深圳市南山區深南大道9037號世界之窗停車場內
• 交通：深圳地鐵1號線/2號線世界之窗站H1出口
• 營業時間：09:30 – 22:00

城市密碼 City Password 夾公仔

夾公仔迷喜訊！「城市密碼」係深圳人氣嘅連鎖夾公仔專門店，分店遍佈各大商場。

店內嘅公仔款式多樣又可愛，最重要係啲夾設計得比較容易夾到，夾中率高，令你輕鬆收穫滿滿嘅戰利品同滿足感，係行街之餘消磨時間嘅好去處。

• 地址：南山海岸城、福田皇庭廣場、羅湖金光華等多間分店
• 營業時間：一般為 10:00 – 22:00

深圳一日遊【主題樂園及戶外景點】

深圳作為一個現代化大都市，同時亦擁有豐富嘅主題樂園同景色怡人嘅戶外景點。

無論你係想尋求刺激機動遊戲嘅快感、同珍禽異獸嚟個近距離接觸，定係想登上摩天輪俯瞰城市美景，深圳都有多元化嘅選擇。

以下為你推介幾個必去嘅主題樂園同戶外景點，適合唔同類型嘅旅客，一家大細或者情侶拍拖都啱玩！

深圳野生動物園

想去野生動物園唔使去到番禺咁遠！

深圳野生動物園佔地廣闊，園內放養咗近300種、數萬隻野生動物，包括國寶大熊貓、華南虎、金絲猴等。

你可以近距離觀賞各種動物，甚至可以自費買飼料餵食長頸鹿、大象等溫馴動物。

最刺激嘅莫過於坐鐵籠車進入猛獸谷，感受獅子、老虎喺身邊擦身而過嘅震撼！

👉🏻 按此預訂即享優惠

• 地址：深圳市南山區西麗路4065號
• 交通：深圳地鐵7號線西麗湖站B出口
• 開放時間：09:30 – 18:00 (入園截至17:00)

深圳世界之窗

想一日之內環遊世界？嚟深圳世界之窗啦！

呢個著名嘅縮微景區將世界各地約130個著名景點，按不同比例仿建而成。

你可以一日內睇晒法國巴黎鐵塔、意大利比薩斜塔同埃及金字塔等。

除咗影相打卡，園區內仲有機動遊戲、侏羅紀世界，以及大型歌舞晚會同巡遊表演，內容豐富，大人細路都啱玩。

👉🏻 按此預訂即享優惠

• 地址：深圳市南山區深南大道9037號
• 交通：深圳地鐵1號線/2號線世界之窗站
• 開放時間：09:00 – 21:30

歡樂港灣 (含摩天輪)

歡樂港灣係近年深圳最紅嘅打卡點之一，重點係嗰座高128米、被譽為「灣區之光」嘅純白摩天輪。

包廂可以360度零死角欣賞深圳灣嘅景色，黃昏同夜晚景色尤其浪漫，有「亞洲版倫敦眼」之稱。

除咗摩天輪，附近仲有海濱文化公園、商業區同「灣區之聲」演藝中心，日頭行街，夜晚睇夜景，非常寫意。

👉🏻 按此預訂即享優惠

• 地址：深圳市寶安區海天路與寶華路交匯處
• 交通：深圳地鐵5號線臨海站B2出口
• 開放時間：摩天輪平日 10:30 – 22:00；週末及假期 10:30 – 22:30

深圳東部華僑城 (含大俠谷)

東部華僑城係一個大型綜合生態旅遊度假區，集合咗休閒度假、觀光探險於一身。

主要分為「大俠谷生態樂園」同「茶溪谷休閒公園」兩大主題公園。

大俠谷以自然景觀同刺激遊樂設施為主，例如驚險嘅木質過山車、激流勇進等；而山頂嘅雲中走廊更係登高望遠嘅熱點，可以飽覽山海美景，玩足一日都唔夠喉。

• 地址：深圳市鹽田區大梅沙東部華僑城
• 交通：市區乘搭巴士前往東部華僑城總站
• 開放時間：大俠谷 09:30 – 18:00

錦繡中華民俗村

想喺短時間內體驗中國五千年文化同大好河山？錦繡中華民俗村就啱晒你。

佢由「錦繡中華」微縮景區同「中華民俗文化村」兩部分組成，前者將中國著名景點如萬里長城、故宮等按比例縮小，後者則展示咗中國56個民族嘅建築風格同民俗風情，仲有精彩嘅大型馬戰同民族歌舞表演，非常適合一家大細前往。

👉🏻 按此預訂即享優惠

• 地址：深圳市南山區深南大道9003號
• 交通：深圳地鐵1號線華僑城站D出口
• 開放時間：09:30 – 22:00

雲里夢想樂園

位於深圳龍崗區嘅雲里夢想樂園，被譽為「深圳版迪士尼」，係一個集高科技、家庭互動、觀光旅遊於一身嘅大型遊樂場。

園內有摩天輪、旋轉木馬、碰碰車等經典機動遊戲，亦有針對小朋友嘅科學教育同親子互動體驗設施，價錢抵玩，最適合一家人享受充滿童真嘅玩樂時光。

👉🏻 按此預訂即享優惠

• 地址：深圳市龍崗區坂田街道發達路雲里智能園
• 交通：深圳地鐵10號線坂田北站A出口
• 開放時間：10:00 – 22:00

觀瀾湖生態體育園

觀瀾湖生態體育園係中國5A級旅遊景區，集生態旅遊、體育休閒同娛樂於一身。

園內除咗有大片綠地同藝術雕塑，仲有NBA互動體驗館，俾籃球迷探索NBA歷史。

園區不時會舉辦各種運動賽事，如果你鍾意高爾夫球、網球、足球等運動，嚟呢度就最啱喇。

👉🏻 按此預訂即享優惠

• 地址：深圳市龍華區觀瀾高爾夫大道1號
• 交通：深圳地鐵4號線觀瀾湖站A出口
• 開放時間：09:00 – 18:00

深圳觀瀾海洋世界

鍾意海洋生物嘅朋友，千祈唔好錯過觀瀾海洋世界！

呢個佔地一萬平方米嘅場館分為10大主題區，展示咗上千種、過萬條海洋生物。

你可以喺海底隧道欣賞壯觀嘅魚群，喺水母迷宮感受夢幻光影，仲可以觀賞精彩嘅美人魚同海獅表演，非常適合親子家庭同情侶約會。

👉🏻 按此預訂即享優惠

• 地址：深圳市龍華區高爾夫大道13號
• 交通：深圳地鐵4號線觀瀾湖站A出口
• 開放時間：09:00 – 18:00

平安國際金融中心Free Sky觀景台

想從高處俯瞰深圳全景？登上深圳最高、近600米嘅平安金融中心就冇錯。

位於116樓嘅Free Sky雲際觀光層，搭高速電梯只需唔使1分鐘就到。

喺度你可以360度零死角欣賞深圳由日頭到夜晚嘅城市景貌，壯觀嘅景色深受攝影愛好者喜愛，絕對係追逐摩天大廈景觀嘅必到之處。

👉🏻 按此預訂即享優惠

• 地址：深圳市福田區益田路5033號
• 交通：深圳地鐵1號線/3號線購物公園站D出口
• 開放時間：10:00 – 22:00

深圳一日遊【按摩及水療SPA】

行到攰、食到飽，深圳一日遊嘅完美句點，梗係要搵間高質嘅水療中心鬆一鬆！

深圳嘅按摩同水療場所以設施齊全、服務專業、性價比高見稱，好多都係24小時營業，而且提供免費水果飲品，甚至可以過夜。

無論你想體驗傳統中式按摩、正宗泰式SPA，定係豪華水療，深圳都有大量選擇，幫你叉足電再返香港。

湯崎.湯泉生活TENZ

湯崎係近年人氣極高嘅大型水療會所，佔地5層，設施極之豪華。

除咗有超過300間按摩房同各式水療浸浴池，仲提供採耳、足底按摩等服務。最正是佢嘅娛樂設施非常多元化，有Switch、PS5、街機、麻雀房、KTV，仲有兒童遊樂區。

餐飲方面，有超過30種飲品同新鮮進口水果任飲任食，連Häagen-Dazs雪糕都係無限量供應，絕對可以 hea 足一日。

👉🏻 按此預訂即享優惠

• 地址：深圳市福田區國花路港城華庭裙樓1至5層
• 交通：鄰近福田口岸，提供免費接駁車服務。
• 營業時間：24小時

水立方國際水療會

水立方係深圳老牌的大型按摩品牌之一，被唔少人視為「水療界天花板」。

店內裝潢氣派，設施齊全，設有火山石桑拿房、大型按摩廳同60間獨立按摩房。提供中式、泰式、日式等多種按摩服務，師傅經驗豐富，手勢正宗。

最抵讚係大部分按摩套餐都包24小時浴票同免費生果飲品，性價比非常高。

👉🏻 按此預訂即享優惠

• 地址：深圳市福田區福田街道漁農社區裕亨路50號
• 交通：鄰近福田口岸，步行可達。
• 營業時間：24小時

艾沐春天Spa

深圳艾沐春天同樣係24小時營業，主打豪華休閒體驗。

會所裝修華麗，環境高級，提供免費專車接送服務。按摩區設有浪漫嘅星空天花板，亦可以選擇私隱度更高嘅私人房間。

客人可以無限享用各種新鮮時令水果同飲品。會所提供多種養生項目，包括精油按摩、中醫艾灸、香薰按摩等，俾你一個帝王級嘅享受。

👉🏻 按此預訂即享優惠

• 地址：深圳市福田區金田路3037號金中環國際商務大廈裙樓2-4樓
• 交通：深圳地鐵1號線/4號線會展中心站E出口
• 營業時間：24小時

森SPA

森Spa係連鎖泰式按摩店，喺福田、羅湖、南山區有多間分店，全部鄰近地鐵站，非常方便。

店內設計以竹木為主，充滿森林嘅靜謐氛圍，令人一入到去就感覺放鬆。

主打傳統古法泰式按摩，技師手法正宗，會運用雙手、手肘等進行拉伸、揉捏，有效緩解肌肉疲勞同失眠等問題。價錢明碼實價，唔需要額外俾小費。

👉🏻 按此預訂即享優惠

• 地址：福田財富廣場店、羅湖金豐城大廈店、南山TCL大廈店等多家分店
• 特色：環境清幽，主打正宗泰式按摩，性價比高。
• 營業時間：約 11:30 – 23:30 (各分店略有不同)

茵特拉根養生溫泉

想浸溫泉唔一定要去日本，深圳東部華僑城入面就有個茵特拉根溫泉。（按此發掘更多深圳溫泉推介！）

溫泉區充滿歐陸小鎮風情，四周被綠油油嘅山林環抱，空氣清新。

溫泉結合中西經典理療，提供多個唔同主題嘅浴區，例如漢方浴、茶禪浴、蔬果浴等，有美容養顏、激活機體等多種功效，俾你喺大自然中享受療癒身心嘅溫泉浴。

👉🏻 按此預訂即享優惠

• 地址：深圳市鹽田區大梅沙東部華僑城茶溪谷
• 交通：市區乘搭巴士至東部華僑城總站，再轉乘園區接駁車。
• 特色：山林環抱嘅主題溫泉，環境優美。

深圳一日遊【大型商場及倉儲式超市】

講到深圳一日遊，行商場同掃平貨絕對係指定動作！

近年深圳開咗唔少超大型商場同倉儲式超市，集齊購物、美食、娛樂於一身，行足一日都唔會悶。

無論你想買名牌、掃平價家品，定係純粹想歎住冷氣行街食嘢，以下幾個熱點都絕對唔可以錯過。

Costco

美國著名嘅大型倉儲式超市Costco（開市客）喺深圳龍華開設首家分店後，即刻成為港人北上掃貨嘅熱點。

場內佔地極廣，商品種類由新鮮食品、零食、家居用品、電器，到名牌手袋、金器都有，性價比極高，好多貨品都係大大份，最啱一家大細或者同朋友夾份買！

• 地址：深圳市龍華區民達路68號
• 交通：深圳地鐵4號線/6號線紅山站
• 營業時間：09:00 – 21:00

山姆超市 Sam’s Club

喺Costco進駐深圳前，山姆超市早已係港人熱愛嘅掃貨天堂。

作為Walmart旗下嘅大型倉儲超市，山姆同樣以貨品份量大、價錢平、品質好見稱。深圳有多間分店，其中福田、前海同龍華分店較受港人歡迎。

店內商品琳瑯滿目，特別係自家品牌Member’s Mark嘅產品，由零食到日用品都好受歡迎。

• 地址：福田店、前海店、龍華店、龍崗店等多間分店
• 交通：(前海店) 深圳地鐵5號線鐵路公園站 / (福田店) 深圳地鐵2號線僑香站
• 營業時間：各分店略有不同，一般為 09:00 – 22:00

前海壹方匯

位於深圳南山區嘅前海壹方匯係一個全新大型商場，毗鄰深圳灣口岸，交通方便。

商場共有6層，設計時尚，匯集咗唔少頂級品牌、特色餐飲同休閒娛樂設施，包括CINESKY新天影院同大食代美食廣場。

商場仲引入咗好多「首店」，例如茶飲店「東方梔子」同極簡風格嘅「涳SPA」，係追求新潮體驗嘅好去處。

• 地址：深圳市南山區南山街道聽海大道5059號
• 交通：深圳地鐵5號線桂灣站直達
• 營業時間：10:00 – 22:00

KK TIME

KK TIME係羅湖水貝商圈嘅全新地標，商場佔地10萬平方米，樓高6層，地鐵直達，非常方便。

商場最大特色係設有超過2萬平方米嘅「臻選‧珠寶生活空間」，仲有特色美食街區「FOOD TIME飯堂」。（按此查看深圳美食推介）

此外，大型超市、親子玩樂品牌MELANDCLUB旗艦店、電影院等應有盡有，係一個集合購物、美食同娛樂於一身嘅綜合性商場。

• 地址：深圳市羅湖區水貝一路與水田一街交叉口
• 交通：深圳地鐵3號線水貝站Ｂ出口 / 7號線洪湖站Ｄ出口
• 營業時間：10:00 – 22:00

萬象城

作為深圳老牌嘅高端購物中心，羅湖萬象城匯聚咗眾多國際一線品牌，裝修氣派豪華，係唔少人心目中嘅購物聖地。

商場時不時會舉辦藝術展覽，亦有好多網紅打卡店，好似人氣麵包店Butterful&Creamorous同Jellycat專門店，好食又好行，係體驗深圳高檔消費嘅必到之處。

• 地址：深圳市羅湖區寶安南路1881號
• 交通：深圳地鐵1號線/2號線大劇院站C出口
• 營業時間：10:00 – 22:00

福田 CoCo Park

福田CoCo Park位於深圳CBD中心區，地鐵購物公園站直達，交通極之方便。

呢個係一個半開放式嘅購物中心，集購物、餐飲、娛樂於一身，有一大片戶外休閒空間，氣氛輕鬆。

商場內有唔少潮流品牌同人氣餐廳進駐，由羅湖口岸出發搭地鐵只需約17分鐘，啱晒作為深圳一日遊嘅第一站或最後一站。

• 地址：深圳市福田區福華三路268號
• 交通：深圳地鐵1號線/3號線購物公園站C出口
• 營業時間：10:00 – 22:00

龍華八號倉

如果你係運動品牌愛好者，龍華八號倉就係你嘅尋寶地。

呢度係一個以運動品牌為主嘅Outlet，匯集咗Adidas、Nike、Puma等各大品牌，折扣力度非常大。

商場一樓亦有啲輕奢品牌如Michael Kors、I.T，而二樓以上則以國產服飾同童裝為主，係一個專攻折扣好貨嘅地方。

• 地址：深圳市龍華區民康路與華南路交匯處
• 交通：深圳地鐵5號線五和站A出口轉乘巴士
• 營業時間：周日至周四 10:00 – 22:00；周五至周六 10:00 – 22:30

大梅沙8號倉奧特萊斯

位於風景優美嘅大梅沙海濱，大梅沙8號倉奧特萊斯將購物同度假完美結合。

商場匯聚咗超過200個國內外知名品牌，涵蓋運動、休閒、童裝等多個類別。

喺度你可以一邊欣賞海景，一邊以超值折扣價掃貨，行完街仲可以去附近嘅大梅沙海灘散步，享受一個悠閒嘅下午。

• 地址：深圳市鹽田區大梅沙環梅路1號
• 交通：市區乘搭巴士前往大梅沙海濱總站
• 營業時間：11:00 – 21:30

深圳一日遊【打卡熱點及文青好去處】

深圳唔單止係經濟發達嘅現代都市，仲有好多充滿文藝氣息嘅角落，等住你去發掘。

無論係由舊工廠改造而成嘅創意園區、保留住歷史痕跡嘅古城古鎮，定係可以俾你靜心欣賞藝術嘅博物館，都非常適合鍾意Citywalk、影相打卡嘅文青們。

以下精選多個文青好去處，俾你嘅深圳一日遊加添一啲文化色彩。

華僑城創意文化園 (OCT LOFT)

華僑城創意文化園由舊廠房區改造而成，係深圳文青嘅聚集地。

園區內充滿藝術同設計感，街道上隨處可見塗鴉、雕塑同特色小店。

呢度經常舉辦各種藝術展覽、創意市集同音樂活動，你可以喺度發掘獨特嘅文創產品，或者搵間有特色嘅Cafe坐低，感受悠閒嘅文藝氛圍。

• 地址：深圳市南山區開平街
• 交通：深圳地鐵1號線僑城東站A出口
• 開放時間：全日開放 (各店舖及展館開放時間不一)

大芬油畫村

大芬油畫村係一個世界聞名嘅油畫集中地，村內巷弄間佈滿咗畫廊、畫室同藝術攤檔。

嚟到呢度，你可以欣賞到由名畫仿作到原創作品等各類畫作，甚至可以搵畫家即席揮毫畫一幅自畫像。

村內仲有新落成嘅大芬美術館，同埋可以體驗油畫同陶藝嘅工作坊，啱晒想扮一日文青嘅你。

• 地址：深圳市龍崗區布吉街道大芬油畫村
• 交通：深圳地鐵3號線大芬站A1出口
• 開放時間：全日開放 (美術館逢週一閉館)

南頭古城

南頭古城有住超過1700年歷史，被譽為「深港歷史文化之根」。

經過活化改造後，古城保留咗城門、縣衙、古祠堂等歷史建築，同時亦引入咗大量文創小店、精品咖啡店、特色餐廳同展覽空間，新舊交融，充滿魅力。

喺古城入面漫步，就好似穿越時空，感受深圳嘅歷史變遷。

• 地址：深圳市南山區南山大道3109號
• 交通：深圳地鐵12號線中山公園站D出口
• 開放時間：全日開放 (各展館及店舖時間不一)

甘坑客家古鎮

甘坑客家古鎮係一個充滿嶺南客家風情嘅古村落，經過改造後變成一個匯集餐飲、文創、住宿於一身嘅旅遊景點。

古鎮保留咗炮樓、古井等歷史遺跡，又有好多特色小店同美食。

夜晚亮燈後，紅燈籠高掛，好似動畫《千與千尋》嘅場景，日夜景色各有千秋，非常值得一遊。

• 地址：深圳市龍崗區吉華街道甘李路18號
• 交通：深圳地鐵10號線甘坑站B出口
• 開放時間：全日開放

大鵬所城

大鵬所城係明代為咗對抗海盜而設立嘅軍事堡壘，至今已有600多年歷史，係深圳八景之一。

城內保留咗完整嘅明清時期街道格局同古建築，例如賴府、劉府同古城門。

遊走喺石板路上，兩旁係特色民宿、文藝小店同地道小食，古樸嘅氛圍令人流連忘返，適合花上半日時間慢慢探索。

• 地址：深圳市龍崗區大鵬街道鵬城社區
• 交通：市區乘搭E11或H92巴士至大鵬中心站，再轉乘B756到大鵬所城站
• 開放時間：全日開放

仙湖植物園

位於羅湖區嘅仙湖植物園係深圳嘅「城中綠洲」，佔地極廣，依山傍水。

園內分為六大景區，展示過萬種植物。最受歡迎嘅打卡位，莫過於沙漠植物區嘅巨大仙人掌溫室，造型各異嘅仙人掌同多肉植物，影相效果一流。

園內仲有著名嘅弘法寺，可以順道參拜，係一個遠離煩囂、親親大自然嘅好地方。

• 地址：深圳市羅湖區蓮塘仙湖路160號
• 交通：深圳地鐵2號線/8號線仙湖路站C2出口
• 開放時間：06:00 – 21:30

深圳灣公園／人才公園

深圳灣公園沿住海岸線而建，擁有超長嘅海濱長廊，可以踩單車或散步，欣賞對岸香港嘅景色。

旁邊嘅人才公園同樣係熱門打卡點，園內有好多現代藝術裝置，環境優美。

呢兩個公園相連，係深圳市民日常休閒運動嘅好去處，亦係睇日落嘅絕佳地點，隨手一拍都係靚相。

• 地址：深圳市南山區濱海大道
• 交通：深圳地鐵9號線深圳灣公園站 / 2號線后海站
• 開放時間：全日開放

東門老街 (含超級文和友)

東門老街係深圳最傳統、最熱鬧嘅商業步行街區，集購物、小食於一體。

而近年最矚目嘅，莫過於「超級文和友」進駐。

呢座建築以8、90年代舊香港市井為主題，將街市、霓虹招牌、舊式招牌等場景重現眼前，復古港風極濃，入面仲有好多食店，打卡醫肚一流。

• 地址：深圳市羅湖區東門
• 交通：深圳地鐵1號線/3號線老街站
• 開放時間：全日開放 (各店舖時間不一)

水圍1368文化街

位於福田口岸附近嘅水圍1368文化街，被稱為「深圳最美城中村」。

呢度由舊式握手樓改造而成，外牆髹上七彩顏色，巷弄間掛滿燈籠，充滿藝術氣息。

街區引入咗唔少特色酒吧、餐廳同手作店，日頭係文青打卡地，夜晚就變成熱鬧嘅蒲點，日與夜呈現唔同風情。

• 地址：深圳市福田區水圍村
• 交通：深圳地鐵4號線/7號線福民站D出口
• 開放時間：全日開放

深圳博物館

想深入了解深圳由一個小漁村發展成國際大都市嘅歷史？嚟深圳博物館就最啱。

博物館係國家一級博物館，免費入場。館藏豐富，透過文物、模型同場景重現，生動咁展示深圳嘅古代史、近代史同改革開放後嘅發展。呢度亦經常舉辦 藝術特展，係一個知性嘅好去處。

• 地址：深圳市福田區福中路市民中心A區
• 交通：深圳地鐵2號線/4號線市民中心站B出口
• 開放時間：10:00 – 18:00 (逢週一閉館)

深圳teamLab未來園

風靡全球嘅teamLab亦登陸深圳！位於中洲灣購物中心嘅「teamLab共創！未來園」，將光影、科技同藝術完美結合，打造出一個夢幻嘅互動數碼世界。

喺寬敞嘅空間入面，你可以透過觸摸、互動，沉浸喺唔同主題嘅奇幻場景之中，無論大人定細路都會被呢個光影世界深深吸引，打卡一流。

• 地址：深圳市福田區濱河大道9283號中洲灣一期購物中心3層
• 交通：深圳地鐵9號線下沙站B出口
• 開放時間：10:00 – 22:00

清水河火車站

想影一輯復古文青相？可以考慮去羅湖嘅清水河火車站。

呢個係一個已經廢棄嘅舊貨運火車站，保留咗舊式綠皮火車、鐵軌同月台，充滿懷舊味道，有啲似香港嘅鐵路博物館。

因為人流唔多，你可以盡情喺度擺pose影相，感受時光倒流嘅寫意感覺。

• 地址：深圳市羅湖區清水河一路 (深圳進元大廈旁)
• 交通：深圳地鐵3號線草埔站D3出口，步行約5分鐘
• 注意：最佳拍攝時間為晏晝，傍晚後可能無法進入。

深圳一日遊【美食推介】

深圳係一個美食熔爐，匯聚全國各地以至世界各國嘅菜式，而且性價比高，味道有保證！

無論你想豪食一餐深圳酒店自助餐、同朋友圍威喂打邊爐，定係想搵間有特色嘅親子餐廳，深圳都有無數選擇。

以下為你精選幾類必試深圳美食，北上醫肚唔使再頭痕！

酒店自助餐 (希爾頓/四季/JW萬豪等)

深圳嘅五星級酒店自助餐出名抵食夾大件，係唔少港人北上慶祝生日或紀念日嘅首選。

好似深圳大中華希爾頓酒店嘅「念」餐廳，提供時令海鮮、即開生蠔、海鮮火鍋，連Häagen-Dazs雪糕都係任食！【按此預訂即享優惠】

另外深圳四季酒店嘅「馥」餐廳、金茂深圳JW萬豪酒店等，都以無限量供應龍蝦、鵝肝等高級食材做賣點，環境高雅，食物質素有保證。

• 推介：深圳大中華希爾頓酒店、深圳四季酒店、金茂深圳JW萬豪酒店
• 特色：任食生蠔、龍蝦、牛扒、時令海鮮，飲品甜品質素高。

日韓烤肉 (青年火爐/宮崎牛一燒肉屋)

鍾意食烤肉嘅朋友，深圳有好多高質選擇。

例如由韓國老闆主理嘅「青年火爐·韓國烤肉店」，主打農家散養黑豬肉同超值牛肉拼盤，套餐豐富，充滿地道韓國風味。（Klook 預訂即享優惠！）

如果想食高級和牛，可以試吓「宮崎牛一燒肉屋」，店內主打印入口即溶嘅A5/M9和牛，仲有專人幫你燒，可以專心享受美食。

• 推介：青年火爐·韓國烤肉店、宮崎牛一燒肉屋
• 特色：(青年火爐) 地道韓國風味，性價比高；(宮崎牛一) 主打高級和牛，專人服務。

特色火鍋 (樂卅市集泰式火鍋)

打邊爐唔一定要食麻辣火鍋，試吓特色嘅泰式火鍋啦！

位於深業上城嘅「泰炙·樂卅市集」就係人氣之選。餐廳選用新鮮香料，提供多款古法湯底，好似經典酸辣冬陰功湯同香甜椰奶雞湯。（Klook 預訂即享優惠！）

配料方面，除咗有深海龍膽魚片、澳洲龍蝦等新鮮海鮮，仲有泰式嫩牛肉等特色菜，味道酸辣開胃，非常惹味。

• 推介：泰炙·樂卅市集
• 地址：深圳市福田區深業上城3樓
• 特色：正宗泰式湯底，海鮮配料新鮮。

親子餐廳 (TIAMO甜慕親子餐廳)

帶住小朋友去旅行，搵食最緊要方便。

TIAMO恬慕親子餐廳就係專為家庭而設，餐廳一半係用餐區，一半係多元化嘅親子遊樂區，小朋友可以盡情放電，大人就可以安心食飯。

餐廳裝修溫馨，充滿童趣，提供天然無添加嘅西式同日韓風味簡餐，如薄餅、沙律等，係親子遊嘅醫肚好去處。

• 推介：TIAMO甜慕親子餐廳
• 地址：深圳市寶安區興華一路19號前海HOP天地3樓
• 特色：集餐飲與遊樂於一身，專為親子家庭設計。

人氣手信糕點 (鮑師傅糕點)

每次返香港前，總要買啲手信。「鮑師傅糕點」絕對係港人必買嘅熱門手信店，長期大排長龍。

佢最出名嘅就係「肉鬆小貝」，鬆軟嘅戚風蛋糕夾住香甜嘅吉士醬，外層再鋪滿鹹香嘅肉鬆同海苔，口感豐富，鹹甜交織，令人一試難忘。買幾盒返屋企做手信，大人細路都鍾意。

• 推介：鮑師傅糕點
• 必買：海苔肉鬆小貝、蟹黃肉鬆小貝
• 分店：深圳各大商場均有分店，如領展中心城、皇庭廣場等。

深圳一日遊：出發前準備

出發深圳一日遊之前，有幾樣嘢要準備好。

深圳貓編為你整合咗交通、過關、支付同上網嘅懶人包，等你輕鬆出發，玩得更盡興！

香港往返深圳交通方式比較（高鐵/地鐵/巴士）

由香港去深圳非常方便，主要可以選擇高鐵、港鐵或跨境巴士，各有優劣，視乎你嘅出發地點、預算同時間而定。

高鐵 (HSR)

最快最舒適嘅選擇，由西九龍站出發，最快14分鐘直達福田站，18分鐘到深圳北站。適合追求速度同舒適度，而且目的地鄰近福田或龍華區嘅朋友。（按此查看高鐵票價）

港鐵 (MTR)

最平民化嘅選擇，乘搭東鐵綫到羅湖站或落馬洲站過關即可。適合住喺東鐵綫沿線，而且唔介意花多少少時間過關嘅旅客。過關後直駁深圳地鐵，非常方便。

跨境巴士

點對點服務，港九新界都有上落車點，直達深圳灣、皇崗、蓮塘等各大口岸，甚至部分市區熱點如COCO Park。適合扶老攜幼，或者買咗好多嘢唔想搬嚟搬去嘅家庭客。（按此查看車票價錢）

主要過關口岸選擇及開放時間

香港同深圳之間有多個陸路口岸，選擇邊個口岸過關，主要取決於你嘅交通方式同目的地。

記得出發前要帶齊回鄉證！

• 羅湖口岸：連接港鐵東鐵綫羅湖站，開放時間為 06:30 – 24:00。過關後係深圳地鐵1號線羅湖站，方便前往東門、萬象城等羅湖區熱點。
• 福田口岸 (落馬洲支線)：連接港鐵東鐵綫落馬洲站，開放時間為 06:30 – 22:30。過關後係深圳地鐵4號線及10號線福田口岸站，去福田CBD、會展中心一帶最方便。
• 深圳灣口岸：主要供跨境巴士、私家車及旅遊巴使用，開放時間為 06:30 – 24:00。鄰近南山區，方便前往歡樂港灣、海岸城、前海等地區。
• 皇崗口岸：唯一24小時通關嘅口岸，主要供跨境巴士及私家車使用。
• 蓮塘/香園圍口岸：最新口岸之一，開放時間為 07:00 – 22:00。人流相對較少，適合前往羅湖東部及龍崗區。

內地電子支付開通教學 (WeChat Pay HK/Alipay HK)

現時北上消費基本上都係用電子支付，非常方便。香港人最常用嘅WeChat Pay HK同Alipay HK都已經支援內地跨境支付，毋須綁定內地銀行戶口。

出發深圳一日遊前，只需喺香港完成身份認證，再增值足夠金額或綁定香港信用卡，到深圳消費時，直接向商戶展示付款碼即可，系統會自動將人民幣金額轉換成港幣結算，超級方便！

SIM卡及數據網絡選擇

想喺深圳隨時隨地上網打卡、搵路？

最方便嘅方法係預先購買SIM卡或租用Wi-Fi蛋。市面上有好多專為內地旅遊而設嘅數據卡，例如「中國/香港/澳門4G上網SIM卡」或「自由鳥Birdie電話卡」，提供無限數據。(網上購買內地數據卡：Klook | KKday)

而且唔使翻牆就可以直接用到Facebook、Instagram、Google Maps等香港常用App，唔怕同朋友失聯。你亦可以喺出發前向香港嘅電訊商開通漫遊數據服務。

深圳一日遊常見問題

深圳一日遊必去景點有哪些？

深圳好玩嘅地方太多，如果係第一次去，或者想去啲最具代表性嘅景點，以下幾個係必去之選：

• 主題樂園類：深圳世界之窗、錦繡中華民俗村。
• 購物美食類：萬象城、福田CoCo Park、東門老街。
• 打卡靚景類：歡樂港灣摩天輪、華僑城創意文化園、甘坑客家古鎮。

深圳親子景點有什麼推介？

深圳有非常多適合一家大細嘅親子景點，可以俾小朋友盡情放電之餘，亦有教育意義：

• 戶外/動物類：深圳野生動物園、深圳觀瀾海洋世界。
• 室內玩樂類：卡魯冰雪世界、Lollypet萌寵樂園、HOP-DX潮玩運動街區。
• 光影藝術類：深圳teamLab未來園。

北上消費需唔需要兌換人民幣？

基本上唔需要。現時深圳絕大部份商戶，由大型商場、餐廳到小攤販，都已經普及電子支付。

香港人只需喺手機安裝 WeChat Pay HK 或 Alipay HK，並完成身份認證同增值，就可以直接掃碼付款，非常方便。

不過，都建議大家準備少量現金（約一、二百元人民幣）傍身，以備不時之需或應付一些只收現金嘅情況。

深圳回香港的尾班車時間？

回程時間取決於你選擇嘅口岸同交通工具，記得預留充足時間過關！

港鐵東鐵線

羅湖站往金鐘方向尾班車約於 23:00 開出；落馬洲站往金鐘方向尾班車約於 21:35 開出。（注意：時間或有變動，請以港鐵最新公布為準）

跨境巴士

唔同路線尾班車時間差異好大。例如永東巴士喺深圳灣口岸嘅尾班車約為21:30，蓮塘口岸約為21:00。皇崗口岸有24小時服務嘅巴士路線。建議預先向巴士公司查詢清楚。（按此預訂直通巴士）

高鐵

由福田站往西九龍站嘅尾班車約於 22:31 開出；深圳北站往西九龍站尾班車約於 21:55 開出。（班次及時間請以官方公布為準）（按此預訂高鐵車票）

睇完以上超詳盡嘅深圳一日遊食買玩攻略，相信你已經對深圳最新好去處瞭如指掌！

無論係想去Costco、山姆掃貨，定係同閨密去打卡影靚相，抑或係一家大細親子放電，都可以參考我哋嘅精選路線，立即計劃你嘅完美深圳週末啦！