週末拍拖諗唔到去邊，厭倦咗行街睇戲食飯？
不如快閃深圳一日遊，發掘更多拍拖約會新意！深圳消費平、交通方便，而且好玩嘅地方愈嚟愈多，無論係想搵個靚景打卡，定係靜靜地享受二人世界，深圳都總有一個地方啱你心水。
深圳貓為你精心整合咗超過30個最新最齊全嘅深圳情侶好去處，涵蓋浪漫打卡、文青藝術、動感室內、悠閒慢活、主題樂園同按摩放鬆六大範疇。
跟住呢個深圳拍拖好去處懶人包，隨時都可以同另一半嚟個話走就走嘅浪漫小旅行！文末更附上交通、支付、上網等實用資訊，助你輕鬆規劃完美約會！
【深圳貓 x Klook 獨家優惠碼】經本網站指定鏈結，於 Klook 中國內地活動滿 HK$100 並輸入優惠碼【NTSY25CN】，即享94折優惠！快啲 save 低呢個優惠碼，下次去深圳用啦！
【深圳情侶好去處】動靜皆宜！室內拍拖玩樂推介
1. Party Day運動超樂場
怕曬又怕落雨，但又想同另一半一齊玩？深圳嘅室內遊樂場就係最好選擇！（Klook 預訂優惠門票）
位於龍崗萬達廣場嘅Party Day運動超樂場佔地超過1萬平方米，有超過50種娛樂同運動項目，包括卡丁車、真雪溜冰、保齡球、碰碰車、VR遊戲等，一張門票就可以玩足全日。
玩到攰仲可以喺商場食嘢shopping，絕對係一個動感十足嘅深圳室內遊樂場約會。
- 地址：深圳市龍崗區平湖街道華南二道萬達廣場6樓
- 營業時間：10:00 – 23:00
- 門票收費：平日約¥168 (2.5小時) / ¥268 (全日)；假日約¥198 (2.5小時) / ¥298 (全日)
- 交通：深圳地鐵10號線「木古站」B出口
2. 玩美攻略
位於福田市中心嘅「玩美攻略」係另一個超大型室內遊樂場，足足有3層高，超過40個遊玩項目。（KKday預訂優惠門票）
同Party Day唔同，呢度除咗有VR戰車、卡丁車、射擊等動態設施，仲有手工陶瓷、數字油畫、自製串珠手鏈等靜態藝術活動，真正做到動靜皆宜！
一張全日票可以無限次進出，啱晒鐘意多元化活動嘅情侶。
- 地址：深圳市福田區深南中路3018號世紀匯廣場
- 營業時間：10:00 – 22:00
- 門票收費：平日¥268；節日假期¥298；夜場票(19:00後)¥168
- 交通：深圳地鐵1號線「華強路站」B出口
3. KP-FUN潮玩遊樂街區
想玩啲新穎刺激啲嘅嘢？位於中洲灣嘅KP-FUN潮玩遊樂街區就啱晒你！（Klook 預訂優惠門票）
呢度有好多坊間少見嘅項目，例如可以360度旋轉嘅電單車，同埋考驗合作性嘅Wargame，非常刺激！
當然，基本嘅MR卡丁車、碰碰車、桌球、夾公仔機都應有盡有。一張全日票就可以任玩所有設施，係唔少港人嘅新蒲點。
- 地址：深圳市福田區中洲灣C Future City商场三樓309號
- 營業時間：10:00 – 22:00
- 門票收費：成人全日票¥268；夜場票(19:00後)¥198
- 交通：深圳地鐵9號線「下沙站」B出口
4. 阿爾卑斯冰雪世界
想喺炎熱嘅夏天感受冰雪樂趣？位於世界之窗景區內嘅阿爾卑斯冰雪世界，一年四季都可以俾你一個冰涼體驗。（Trip.com 預訂優惠門票）
場館分為嬉雪區同滑雪區，就算你係初學者定滑雪高手都啱玩。
專業滑雪道長約70米，高約20米，由山頂一衝而下非常刺激！
除咗滑雪，場内仲有好多冰雕打卡位，情侶可以喺度影番輯「冬季戀歌」feel嘅相。
- 地址：深圳市南山區深南大道9037號 (世界之窗內)
- 營業時間：10:00 – 21:00
- 門票收費：約¥65起 (不包括世界之窗門票)
- 交通：深圳地鐵1/2號線「世界之窗站」J出口
5. 中影萬友影城（床廳影院）
睇戲都可以有好特別嘅體驗！位於羅湖IBC MALL嘅中影萬友影城設有超豪華嘅「床廳」。
呢個VIP影廳提供嘅唔係普通座位，而係雙人梳化床！情侶可以一齊躺喺床上，舒舒服服咁睇戲，甜蜜指数爆燈。
呢個絕對係情侶約會清單上嘅必試項目，為普通嘅睇戲活動增添幾分情趣。
- 地址：深圳市羅湖區布心路3008號IBC MALL 4樓
- 營業時間：約 09:00 – 00:00
- 門票收費：¥20 – ¥55不等 (視乎電影及場次)
- 交通：深圳地鐵3號線「水貝站」A出口
6. KTV推介：魅KTV / COSO PARTY
「Come on, James!」食完飯想同另一半或者一大班朋友唱K？深圳有好多高質KTV選擇！
「魅KTV」係人氣連鎖店，分店多數喺商場入面，夠方便，音響設備同曲庫都唔錯。
如果想搞生日派對或者慶祝活動，「COSO PARTY KTV」就更加適合，佢哋主打派對策劃，裝修充滿未來感，好似置身太空艙咁，打卡一流！
- 魅KTV (領展中心城店)：福田區福華壹路3號領展中心城M層 (會展中心站B出口)
- COSO PARTY (車公廟店)：深南大道6019號金潤大厦二層 (車公廟站C出口)
【深圳情侶好去處】極致放鬆！按摩水療體驗
1. 湯崎湯泉生活TENZ
如果想搵個地方舒服咁過夜，湯崎都係一個唔錯嘅選擇。（Klook 預訂即享優惠）
呢度最抵嘅係純過夜方案，喺大衆點評買券最平¥98就有交易，包任玩場内電玩、桌遊等設施。
如果想浸浴同食嘢，可以考慮小憩套票，包6小時浴票、免費Häagen-Dazs雪糕同生果任食，性價比超高。店内仲有個大型書室，可以享受悠閑嘅閱讀時光。
- 地址：深圳市福田區國花路港城華庭裙樓1-5層
- 收費：「不含浴票」過夜券¥98；6小時小憩券(包浸浴及餐飲)約¥257起
- 交通：深圳地鐵4號線「福田口岸站」A出口步行約10分鐘
2. 湯悦温泉汗蒸
行到攰、玩到攰，想搵個地方徹底放鬆？湯悦温泉汗蒸就係不二之選。（Klook 預訂即享優惠）
呢度鄰近福田口岸，交通方便，而且24小時營業，就算玩到幾夜都唔怕。
場内提供泡湯、汗蒸、按摩等多種服務，仲有電競房、遊戲區等娛樂設施。最正嘅係，休息區內嘅水果同雪糕都係免費任食，絕對係情侶北上relax嘅性價比之選。
- 地址：深圳市福田區車公廟泰然四路109棟
- 營業時間：24小時
- 收費：24小時淨桑拿約¥126起
- 交通：深圳地鐵1/7/9/11號線「車公廟站」C出口
3. 涳SPA
想同另一半享受高質嘅SPA按摩？距離深圳灣口岸約10分鐘車程嘅涳SPA就主打高私隱度同精緻體驗。
全店採用奶油色系装修，環境舒適。每間房都有獨立浴缸和可飽覽深圳灣景色嘅落地窗。
呢度提供按摩、熱石、精油SPA等多種療程，網民大讚技師手勢好，絕對可以俾你同另一半一個奢華放鬆嘅下午。
- 地址：深圳市南山區中心路3019號天虹大廈8層803
- 交通：深圳地鐵2號線「登良站」A出口步行约10分鐘
【深圳情侶好去處】浪漫滿分！必去情侶打卡景點
1. 歡樂港灣「灣區之光」摩天輪
講到深圳最浪漫嘅地標，一定唔少得歡樂港灣嘅「灣區之光」摩天輪！（Klook 預訂優惠門票）
呢個高達128米嘅摩天輪係深圳最高，情侶可以喺透明轎廂入面，隨住摩天輪緩緩上升，360度飽覽深圳嘅壯麗景色。建議黃昏時段嚟，可以欣賞埋日落靚景。
到咗夜晚，海濱文化公園仲有璀璨嘅燈光show同音樂噴泉表演，氣氛夠哂浪漫，絕對係情侶約會嘅首選深圳浪漫摩天輪好去處！
- 地址：深圳市寶安區新安街道海旺社區寶興路8號
- 營業時間：星期一至五 09:00 – 21:00；星期六、日及假日 10:00 – 22:00
- 交通：深圳地鐵5號線「臨海站」B2出口直達；或乘搭環島中港通跨境巴士由香港直達
2. 鹽田海濱棧道
想同另一半手拖手漫步，享受海風吹拂？
全長19.5公里嘅鹽田海濱棧道就最適合不過。棧道沿海而建，純白色嘅設計配上蔚藍大海，充滿歐陸海邊小鎮嘅悠閒感覺。
沿途仲有紅白相間嘅「背仔角燈塔」同埋被譽為「深圳最美書店」之一嘅燈塔圖書館可以打卡。
黃昏時分，一邊散步一邊欣賞日落晚霞，畫面靚到好似一幅畫，絕對係免費又浪漫嘅拍拖之選。
- 地址：深圳市鹽田區海景棧道與海山路交叉口
- 營業時間：06:00 – 21:00
- 交通：深圳地鐵8號線「鹽田墟站」B出口或「海山站」B出口
3. 前海石公園
前海石公園近年成為新興嘅情侶打卡熱點，以無邊際海景同唯美嘅日落景色而聞名。
公園內仲有大片嘅花海，例如粉黛草、狼尾草等，隨手一拍都係充滿少女心嘅網紅美照。
嚟到呢度，除咗可以同另一半喺海邊漫步、打卡之外，仲可以順便睇埋深圳嘅地標「前海石」，享受一個浪漫又寫意嘅下午。
- 地址：深圳市南山區前海自貿合作區前灣二路
- 營業時間：06:00 – 23:00
- 門票收費：免費入場
- 交通：深圳地鐵「前灣站」C出口
4. 玫瑰海岸
想遠離城市煩囂，同另一半享受異國度假風情？
位於深圳東部嘅玫瑰海岸就係你嘅不二之選。呢度擁有約7萬平方米嘅廣闊沙滩，仲可以望到若隱若現嘅香港群山。
最吸引情侶嘅係，場內有好多夢幻打卡場景，例如歐式城堡、七彩花海等，天氣好嘅時候配上藍天白雲，就好似去咗外國影婚紗相一樣，非常浪漫！
- 地址：深圳市龍崗區深葵公路
- 營業時間：星期一至五 08:00 – 22:00；星期六日 08:00 – 23:00
- 門票收費：成人¥50；夜場票¥100
- 交通：乘搭巴士B755、823、364路至「玫瑰海岸站」
5. 深圳人才公園
如果唔想次次都係行商場，不妨考慮去深圳人才公園過一個悠閒嘅下午。
呢個係中國首個以「人才」為主題嘅市政公園，鄰近海邊，景色開揚。
公園内設施完善，有海景露台、長廊同棧道，周圍仲有唔少現代化嘅藝術裝置，非常適合散步、野餐或者踩單車，享受一個簡單而美好嘅約會時光。
- 地址：深圳市南山區科苑南路3329號
- 營業時間：06:00 – 23:00
- 門票收費：免費入場
- 交通：深圳地鐵2號線或11號線「後海站」H出口
6. 雲上圖書館
被譽為「深圳版天空之城」嘅雲上圖書館，絕對係文青情侶必到嘅朝聖地。
圖書館位於海拔380米高嘅山上，外形以輪船為概念，好似一艘潔白嘅郵輪，設計感十足。
最正是佢嘅地理位置，可以從高處俯瞰鹽田港，透過360度透明玻璃欣賞山海全景。喺呢度一邊睇書，一邊叹咖啡，一邊欣賞風景，夠哂寫意。
- 地址：深圳市鹽田區三洲塘水庫
- 營業時間：09:00 – 18:00 (逢星期一閉館)
- 交通：乘搭雲海專線A/B線直達雲海廣場；或於「鹽田港西站」B出口轉乘雲海專線
【深圳情侶遊】文青最愛！藝術文化深度遊
1. 深圳teamLab共創！未來園
全球知名嘅沉浸式光影互動藝術展teamLab，唔使飛去日本，喺深圳都有得睇！
深圳teamLab以「共創」為概念，設有10個唔同主題嘅互動場景，包括招牌嘅發光波波《光球管弦樂團》，同埋可以同光影互動嘅《塗鴉自然》，情侶可以一齊創作屬於自己嘅藝術作品。
呢個深圳文青打卡熱點，絕對可以俾你同另一半帶嚟一個夢幻又難忘嘅體驗。
- 地址：深圳市福田區中洲灣一期購物中心L3層L309-L310號
- 營業時間：星期日至四 10:00 – 22:00；星期五至六 10:00 – 22:30
- 門票收費：約¥128
- 交通：深圳地鐵9號線「下沙站」B出口
2. 大芬油畫村
有「中國第一油畫村」之稱嘅大芬油畫村，係一個充滿藝術氣息嘅小社區。
大街小巷都係色彩繽紛嘅街頭塗鴉同藝術作品，周圍都搵到打卡位。除咗影相，呢度仲有好多陶藝同油畫體驗工作坊，最平只需¥30就可以體驗畫油畫，仲有專人指導。
情侶一齊創作一件藝術品，作為深圳約會嘅紀念品，非常有意義。
- 地址：深圳市龍崗區布吉街道大芬油畫村內
- 營業時間：09:30 – 17:30
- 門票收費：免費入場 (工作坊費用另計)
- 交通：深圳地鐵3號線「大芬站」A出口
3. 華僑城創意文化園 (OCT-LOFT)
OCT-LOFT由廢棄嘅舊廠房改造而成，係深圳最早嘅藝術創意社區之一。
呢度匯集咗好多設計公司、特色小店、精品書店同咖啡店，充滿濃厚嘅文藝氛圍。
園區內周圍都係創意十足嘅藝術裝置同塗鴉牆，打卡一流。週末仲經常舉辦創意市集同文化活動，啱晒文青情侣嚟呢度尋寶、睇展覽，享受悠閒嘅一日。
- 地址：深圳市南山區錦繡北街2號
- 營業時間：全日開放 (市集及店鋪約10:00 – 22:00)
- 門票收費：免費入場
- 交通：深圳地鐵2號線「僑城北站」B出口
4. 深圳當代藝術館與城市規劃展覽館
想搵個地方靜靜地睇展覽？呢個「兩館一體」嘅藝術館就係一個好選擇。
佢嘅建築設計本身已經係一件藝術品，充滿未來感嘅流線型外觀，每個角落都係打卡位。
館內除咗展出深圳嘅城市規劃發展史，亦會定期舉辦唔同主題嘅當代藝術展覽。最重要係免費入場，只需要提前預約就可以，性價比極高！
- 地址：深圳市福田區蓮花街道福中路184號
- 营业时间：10:00 – 18:00 (逢星期一閉館)
- 門票收費：免費入場 (需提前在官方公眾號預約)
- 交通：深圳地鐵3/4號線「少年宮站」A2出口
5. TSUTAYA BOOKSTORE 蔦屋
被譽為「全世界最美二十家書店」之一嘅日本蔦屋書店，喺深圳福田都開咗分店。
佔地2,000平方米嘅空間，唔單止係一間書店，更係一個集藝術、文創、咖啡同音樂於一身嘅複合型文化空間。
情侶可以喺度搵本好書，揀個舒適嘅角落，買杯咖啡，享受一個充滿書卷氣嘅下午，絕對係文青情侶嘅拍拖好去處。
- 地址：深圳市福田區濱河大道中洲灣C Future City B2層
- 營業時間：星期日至四 10:00 – 22:00；星期五六 10:00 – 22:30
- 交通：深圳地鐵9號線「下沙站」B出口
6. 深圳圖書館北館
深圳最新最大嘅圖書館，以「科技」為主題，最震撼嘅莫過於隱藏喺館内、高達18米嘅「太空電梯」！
呢個超巨型地下書庫，設計充滿科幻感同工業風，可容納超過400萬冊實體書，非常壯觀。
不過想睇到佢嘅真面目一啲都唔容易，因為目前只喺週末開放參觀，每日名額極少，想去朝聖就要mark實時間預約喇！
- 地址：深圳市龍華區騰龍路與中梅路交口
- 營業時間：10:00 – 22:00
- 預約指引：需在「深圳圖書館」官方微信公眾號預約。地下書庫參觀名額需另外預約。
- 交通：深圳地鐵4/6號線「紅山站」A1出口
7. OAO藝術空間
如果另一半鍾意影相打卡，就一定要帶佢嚟OAO藝術空間！
呢度位於有「流量園區」之稱嘅直播電商基地內，係一個專為街拍而設嘅打卡街區。場内有數十個唔同風格嘅場景，無論係歐美風、韓系、小清新定Y2K風格，都可以滿足你嘅拍摄慾望。
情侶可以喺度大玩特玩，互影靚相，絕對係深圳情侶打卡必去嘅地方。
- 地址：深圳市寶安區福洲大道智美匯志產業園
- 營業時間：09:00 – 19:30
- 交通：深圳地鐵「福永站」D出口
【深圳拍拖好去處】慢活時光！古鎮公園悠閒遊
1. 南頭古城
南頭古城有接近1700年歷史，係一個24小時開放嘅文化創意街區。
城內保留咗好多古色古香嘅歷史建築，但同時又注入咗好多新元素，例如特色小食店、文創精品店、黑膠唱片咖啡店等等。
情侶可以喺呢度穿梭於古城小巷，一邊探索小店，一邊品嚐地道小食，感受新舊交融嘅獨特魅力，過一個悠閒嘅下午。
- 地址：深圳市南山區南頭天橋北8米處
- 營業時間：24小時開放
- 門票收費：免費入場
- 交通：深圳地鐵12號線「南頭古城站」C出口
2. 甘坑古鎮
甘坑古鎮係一個明朝建立嘅客家小鎮，而家已經發展成一個充滿特色嘅文化旅遊區。
情侶可以喺有過百年歷史嘅狀元府、南香樓欣賞嶺南古建築之美。
入夜後，掛滿幾百個燈籠嘅史記亭更加係打卡熱點。鎮內仲不時有粵劇、古裝舞蹈等表演，令人仿佛穿越時空，體驗古人嘅生活。
- 地址：深圳市龍崗區布吉吉華街道甘李路18號
- 營業時間：24小時開放
- 門票收費：免費入場
- 交通：深圳地鐵10號線「甘坑站」B出口
3. 仙湖植物園
被譽為國家4A級景區嘅仙湖植物園，絕對係拍拖聖地！
園區佔地極廣，分為6大園區，種植咗過萬種植物。仙湖嘅景色四季都唔同，春天繁花盛放，秋冬有詩意盎然嘅金黃落羽杉林。
同另一半手拖手喺林蔭步道漫步，呼吸新鮮空氣，喺呢個城市中嘅綠洲享受片刻寧靜，非常療癒。
- 地址：深圳市羅湖區蓮塘街道仙湖路160號
- 開放時間：06:00 – 21:30 (部分景點於18:00後關閉)
- 購票時段：08:00 – 18:00 (60歲以上長者免費)
- 交通：深圳地鐵2/8號線「仙湖路站」C2/C3出口
4. 東湖公園
東湖公園係深圳人嘅露營野餐好去處，公園面積非常大，前身係一個水庫。
園内有好多景區，包括人工湖、雕塑園、盆景世界等等。當中最受情侶歡迎嘅就係「棕櫚園」，一大片廣闊嘅草坪上種滿棕櫚樹，充滿熱帶風情。
假日可以帶備野餐墊，同另一半喺草地上野餐，甚至DIY吊床，享受悠閒嘅二人時光。
- 地址：深圳市羅湖區愛國路4006號
- 交通：由蓮塘口岸出發，沿羅沙路步行約15分鐘即可到達。
5. 梧桐山風景名勝區
如果情侶二人鍾意行山睇風景，就唔可以錯過梧桐山。
呢度係國家級風景名勝區，一年四季都有唔同種類嘅花盛開，例如杜鵑花、山茶花、風鈴花等，形成震撼嘅花海景觀。
除咗賞花打卡，仲可以登上山頂，一睹被譽為「深圳八景」之一嘅「梧嶺天池」，將壯麗山景盡收眼底。
- 地址：廣東省深圳市羅湖區
- 營業時間：06:00 – 19:00
- 交通：乘搭巴士211號至「梧桐山總站」
【深圳情侶景點】刺激之選！主題樂園全攻略
1. 深圳歡樂谷
鍾意刺激機動游戲嘅情侶，深圳歡樂谷絕對可以滿足你！（Klook 預訂優惠門票）
作為國家5A級旅遊景區，佔地35萬平方米嘅歡樂谷設有9大主题區，刺激嘅機動遊戲、水上活動應有盡有。
必玩推介包括亞洲首座W型水花過山車，同埋世界落差最高嘅激流。除咗玩，園區仲有光影show、魔術show等精彩表演，玩足一日都唔會悶！
- 地址：深圳市南山區僑城西街18號
- 營業時間：10:00 – 21:00
- 門票收費：成人約¥260；兒童及长者約¥130
- 交通：深圳地鐵1/2號線「世界之窗站」A出口
2. 世界之窗
想同另一半一日之內環遊世界？嚟世界之窗就可以實現願望！（Klook 預訂享優惠）
呢個深圳代表性嘅主題公園，以微縮景觀聞名，集合咗全球超過130個知名景點，例如巴黎鐵塔、埃及金字塔、美國大峽谷等，打卡一流。
除咗影相，園區仲設有機動游戲、大型歌舞表演同主題活動，一個地方就可以滿足晒睇景、打卡、玩樂幾個願望！
- 地址：深圳市南山區深南大道9037號
- 營業時間：10:00 – 21:00
- 門票收費：全日票成人約¥220；夜場票約¥100
- 交通：深圳地鐵1/2號線「世界之窗站」A出口
3. 東部華僑城
東部華僑城係一個綜合性嘅大型主題樂園，分为「大俠谷」同「茶溪谷」兩個主題公園，一張門票可以滿足唔同喜好嘅情侶。
好動型嘅可以去「大俠谷探險樂園」，挑戰懸崖邊嘅全玻璃觀景步道同刺激嘅木質過山車；鍾意悠閒打卡嘅就可以去「茶溪谷度假公園」，喺歐陸小鎮同濕地花田影相，或者去品茶睇表演，各取所需。
- 地址：深圳市鹽田區大梅沙東部華僑城
- 營業時間：09:30 – 18:00
- 门票收费：大侠谷成人¥200；茶溪谷成人¥160
- 交通：乘搭巴士至「東部華僑城大俠谷站」
【深圳拍拖好去處】潮人必逛！特色商場與街區
1. 深業上城
深業上城同一般倒模式嘅大型商場唔同，佢嘅最大特色係位於商場3樓、充滿歐洲小鎮風格嘅「Loft小鎮」。
一整排由紅、橙、黃、白等鲜明顏色組成嘅建築物，加上橫跨兩邊建築物嘅天橋，構成咗超紅嘅打卡熱點。陽光普照嘅時候，光影效果令照片更加靚。
商場本身亦匯集咗好多品牌同特色餐廳，影完相仲可以食嘢shopping，係情侶輕松散步、約會嘅好地方。
- 地址：深圳市福田區皇崗路5001號
- 營業時間：10:00 – 22:00
- 交通：深圳地鐵10號線「冬瓜嶺站」A出口
2. 萬象天地
位於南山區嘅萬象天地，係一個結合咗室內商場同戶外街區嘅潮流地標。呢度雲集咗超過400間店铺，包括好多網紅餐廳、潮牌、玩樂體驗店等。
商場仲不時舉辦各種潮流限定活動，例如人氣卡通期間限定店、藝術展覽等。無論係想食大餐、飲下午茶，定係想行街shopping，萬象天地都能夠滿足你嘅約會需求。
- 地址：深圳市南山區科發路19號
- 交通：深圳地鐵1號線「高新園站」A出口
3. 羅湖益田假日廣場
羅湖益田假日廣場定位為「多元藝術體驗式購物中心」，除咗有大型購物中心，仲有戶外街區同藝術建築。
呢度匯集咗好多人氣餐廳，例如連續多年上榜大眾點評必食榜嘅「貴廚酸湯牛肉」華南首店就喺度。商場鄰近地鐵站，交通方便，啱晒喺羅湖過關嘅情侶作為第一站或最後一站。
- 地址：深圳市羅湖區翠竹街道華麗路2038號
- 交通：深圳地鐵3號線「翠竹站」B1/B2出口
深圳情侶遊實用資訊
交通懶人包（過關口岸／地鐵／巴士）
香港往返深圳嘅交通非常方便。主要過關口岸包括羅湖、福田、深圳灣、蓮塘及香園圍。
如果主要喺市中心玩，建議使用羅湖或福田口岸，過關後可直接轉乘深圳地鐵。深圳地鐵網絡非常發達，覆蓋大部分景點，係最方便嘅交通方式。
如果前往較偏遠嘅地方（如大梅沙、玫瑰海岸），則可能需要轉乘巴士。
延伸閱讀：
內地支付方式教學（AlipayHK / WeChat Pay HK）
現時喺深圳消費，一部手機就搞掂！香港人常用嘅AlipayHK（支付寶香港）同WeChat Pay HK（微信支付香港）已經可以直接喺内地大部分接受電子支付嘅商戶使用，無需綁定内地銀行卡。
消費時會直接按當日匯率由港弊結算，非常方便。出發前記得先做好身份認證，並增值足够金額，就可以輕鬆消費。
上網電話卡／eSIM 選購指南
去深圳玩當然要保持上網！市面上有好多選擇，最常見嘅係購買「大灣區」數據卡，喺鴨寮街或各大電訊商門市都有售，即插即用。
如果唔想換卡，可以考慮購買eSIM，出發前喺網上購買並安装好，一過關就可以即刻啟用，非常方便。部分電訊商亦提供每日$10-$20不等嘅漫遊數據套餐，可以按需要選擇。
深圳情侶好去處：常見問題
深圳拍拖一日遊行程可以怎樣規劃？
深圳情侶一日遊可以根據喜好規劃，以下提供一個「動靜結合」嘅行程參考：
- 上午 (文青慢活)：由福田口岸過關後，乘地鐵到「少年宮站」，參觀深圳當代藝術館，感受藝術氣息。
- 中午 (打卡美食)：到深業上城，在Loft小鎮影靚相打卡，並在商場内的網紅餐廳享用午餐。
- 下午 (室內玩樂)：轉場到福田最大室內遊樂場「玩美攻略」（KKday預訂優惠門票），一齊玩卡丁車、VR遊戲，或體驗手作工作坊。
- 晚上 (浪漫晚餐)：前往歡樂港灣，乘坐「灣區之光」摩天輪欣賞日落及夜景（Klook 預訂優惠門票），再喺海邊餐廳享受一頓浪漫晚餐，結束完美一日。
延伸閱讀：
哪些情侶景點是免費入場？
深圳有好多高質素又免費嘅情侶好去處，非常適合預算有限嘅朋友！以下係部分免費入場嘅景點推介：
- 文藝類：大芬油畫村、華僑城創意文化園 (OCT-LOFT)、深圳當代藝術館（需預約）、南頭古城、甘坑古鎮。
- 自然風光類：鹽田海濱棧道、前海石公園、深圳人才公園、梧桐山風景名勝區、東湖公園。
在深圳消費用什麼信用卡最划算？
北上消費想賺盡回贈，選擇合適嘅信用卡非常重要！
建議選擇主打人民幣或内地消費高回贈嘅信用卡。例如部分銀行推出嘅雙幣卡，喺内地以人民幣簽賬可免除手續費，匯率更佳。
另外，將信用卡綁定AlipayHK或WeChat Pay HK消費，亦有唔少信用卡提供高達4%或以上嘅現金回贈。
出發前不妨比较一下不同信用卡嘅内地消費優惠，做個精明消費者。（詳情可參考各大銀行官網最新推廣）
睇完以上超過30個深圳情侶好去處，係咪已經搵到心水目的地，準備同另一半製造浪漫驚喜呢？
無論你哋鍾情於邊種類型嘅約會，呢份超齊全懶人包都能滿足你哋嘅需要。立即收藏呢篇攻略，計劃一場話走就走嘅甜蜜深圳之旅，創造更多美好回憶啦！
深圳貓編 Sally，來自香港嘅90後女生，在家係貓奴，在外係社畜。放假鍾意周圍去，發掘唔同嘅地方。自從疫情通關後已北上深圳超過100次，鍾意深圳夠近夠方便、又平又好多嘢食！週末假期會去深圳行街、按摩、食嘢，整理成旅遊攻略分享。希望大家以後去深圳，都會嚟搵深圳貓，記得貓咪伴你行！
發表留言