隨著深港交通越來越便利，經深圳灣口岸北上快閃已成為不少香港人的週末指定動作。
加上深圳地鐵13號線正式開通，直達口岸，令前往南山及寶安區的各個深圳灣好去處變得更加方便快捷！
無論你係計劃深圳一日遊，抑或係想嚟個深圳兩日一夜小旅行，呢份最新懶人包都會為你整合深圳灣口岸的開放時間、過關流程、交通、美食及必去景點，一篇睇晒所有實用資訊！
【深圳貓 x Klook 獨家優惠碼】經本網站指定鏈結，於 Klook 中國內地活動滿 HK$100 並輸入優惠碼【NTSY25CN】，即享94折優惠！快啲 save 低呢個優惠碼，下次去深圳用啦！
深圳灣口岸好去處：特色景點推介 (文青打卡/偽旅行篇)
除了行商場，深圳灣附近仲有好多充滿特色嘅文青景點，無論係想影靚相打卡，定係想感受歷史文化氣息，呢度都滿足到你！
1. 南頭古城 (歷史街區與文青小店)
擁有近1,700年歷史嘅南頭古城，近年經過活化，成為一個集歷史古蹟、文創小店、特色咖啡店同藝術裝置於一身嘅文青蒲點。喺古城內，你可以欣賞到古代建築，又可以捐窿捐罅發掘各種有趣嘅小店，感受新舊文化交融嘅獨特氛圍。
- 地址：深圳市南山區深南大道
- 開放時間：全天開放 (店舖營業時間各異)
- 交通：深圳灣口岸乘搭M506號線巴士，於「南山公安分局站」下車。
2. 南山荷蘭花卉小鎮 (免費入場賞花)
想睇花海唔一定要飛去荷蘭！呢個花卉小鎮免費入場，園內有標誌性嘅荷蘭大風車同歐式建築，仲有五彩繽紛嘅花壇（季節性會有鬱金香花展），彷彿走進童話世界。除咗影相打卡，小鎮內仲有花卉展廳、咖啡店同DIY工作坊，係週末半日遊嘅好去處。
- 地址：深圳市南山區月亮灣大道3008號
- 開放時間：全天開放
- 交通：搭乘地鐵12號線至「南頭古城站」D出口，轉乘的士約10分鐘車程。
3. 歐洲印象小鎮 (世界之窗旁)
冇時間冇預算去歐洲？嚟呢度就可以來一場「偽歐遊」！小鎮位於世界之窗旁邊，高度模仿歐洲嘅建築、運河同橋樑，周圍都係打卡位。最重要係免費入場，大家可以喺大街小巷盡情影相，感受濃厚嘅歐陸風情。
- 地址：深圳市南山區深南大道9037-6號
- 開放時間：全天開放
- 交通：深圳灣口岸乘搭90號線巴士，於「世界之窗站」下車。
4. 南山前海石公園 (無敵海景睇日落)
想喺深圳市區睇無邊際海景同日落，前海石公園絕對係秘境之選！
公園遊人唔多，可以靜靜地欣賞壯闊嘅跨海大橋同城市天際線。呢度嘅大海比深圳灣公園更寬廣，每日上演嘅海上日落景色都非常夢幻，啱晒鍾意影風景相嘅朋友。
- 地址：深圳市南山區前海
- 開放時間：全天開放
- 交通：深圳地鐵5號線「前灣站」C出口，步行約1公里。
5. 深圳圖書館北館 (太空電梯書庫)
被譽為深圳最新最大嘅圖書館，以「科技」為主題，最震撼嘅就係隱藏住18米高、極具科幻感嘅「太空電梯」地下書庫！
書庫可容納超過400萬冊實體書，不過參觀名額極之有限，需要喺「深圳圖書館」官微預約，想去朝聖就要捕實啲喇！
- 地址：深圳市龍華區
- 開放時間：10:00-22:00（詳情以官方公佈為準）
- 交通：地鐵4/6號線「紅山站」A1出口，步行約200米。
6. 鍾書閣 (螺旋式書架)
全國有名嘅「最美書店」鍾書閣，喺歡樂港灣都有分店。店內最吸睛嘅就係貫穿全店嘅紅色螺旋式書架，加上階梯式書牆，設計感超強，科技感十足，點影都係大片！店內藏書約4.5萬冊，係一個集書卷氣與藝術感於一身嘅打卡聖地。
- 地址：深圳市寶安區華僑城歡樂港灣東岸L1-021
- 開放時間：10:00-22:00
- 交通：地鐵5號線「臨海站」B2出口。
7. 南山書城
南山書城同樣被譽為「深圳最美書店」之一，裝修時尚有格調，吸引唔少人專程去打卡睇書。除咗圖書種類繁多，仲會售賣故宮月曆等文創商品，二樓亦不定期更新人氣IP產品，例如哈利波特、鬼滅之刃等，行完海岸城不妨過嚟睇睇。
- 地址：深圳市南山區南海大道2748號
- 開放時間：09:30 – 22:00
- 交通：深圳灣口岸乘搭M474巴士，於「中洲控股中心大廈站」下車。
深圳灣好去處：主題樂園推介 (親子情侶篇)
如果你嘅深圳一日遊係想尋求刺激同歡樂，深圳灣附近嘅大型主題樂園就係你嘅不二之選，無論係親子家庭定係情侶拍拖都一樣咁適合！
1. 世界之窗
想一日之內環遊世界？嚟世界之窗就得！呢個大型微縮景區以不同比例複製咗全球五大洲共130個著名景點，包括巴黎鐵塔、凱旋門、埃及金字塔等，像真度極高，打卡一流！
園區內亦有不同國家嘅特色文化表演，例如日本茶道、歐陸風情歌舞等，內容豐富，非常適合親子遊，具教育意義又好玩。
- 地址：深圳市南山區深南大道9037號
- 營業時間：09:00 – 21:30
- 交通：深圳灣口岸乘搭90號巴士直達；或乘搭地鐵1/2號線至「世界之窗站」。
2. 錦繡中華民俗文化村
想深入了解中國不同民族嘅風情文化，就一定要去錦繡中華民俗文化村。
園區分為兩部分：「錦繡中華微縮景區」以1:15比例複製咗82個中國著名景點，俾你一次過遊遍大江南北；「中國民俗文化村」則有28個按真實比例建成嘅村寨，展示各民族嘅風土人情。園區嘅大型實景表演如《東方霓裳》同《大漠傳奇》都非常精彩，絕對不能錯過！
- 地址：深圳市南山區深南大道9005號
- 營業時間：09:30 – 22:00 (具體時間以現場公告為準)
- 交通：乘搭地鐵1號線至「華僑城站」D出口，步行約5分鐘。
深圳灣口岸周邊：必到大型商場推介 (購物玩樂篇)
深圳灣口岸附近嘅南山區係深圳最繁華嘅地區之一，雲集各大頂級商場，由名牌購物、親子玩樂到特色餐飲都應有盡有，絕對係深圳灣好去處嘅首選！
1. 萬象天地 (打卡大象/MELAND CLUB)
萬象天地係一個結合戶外步行街同室內商場嘅綜合購物中心，門口嘅巨型吹氣大象「Bubblecoat Elephant」係必到打卡點！
場內有近300間店舖，更有人氣親子樂園MELAND CLUB分店，小朋友可以盡情放電，大人就可以專心Shopping！
- 地址：深圳市南山區深南大道9668號
- 營業時間：10:00 – 22:00
- 交通：深圳地鐵1號線「高新園站」A出口，步行約2分鐘。
2. 深圳灣萬象城 (名牌/藝術展覽)
定位高端奢華嘅深圳灣萬象城，匯聚Valentino、Loewe、Chanel等國際一線品牌。
商場設計充滿藝術感，經常舉辦大型藝術展覽同市集，例如之前就辦過巨型貓咪主題展，每次去都有新驚喜！
- 地址：深圳市南山區科苑南路2888號
- 營業時間：10:00 – 22:00
- 交通：深圳地鐵2/11號線「后海站」G出口直達。
3. 海岸城購物中心 (食買玩一站式)
海岸城係南山區嘅老牌人氣商場，食、買、玩一站式搞掂。想玩夾公仔機可以去「城市密碼」，想做運動可以去「X-JOY 運動街區」（Klook 預訂優惠門票）。
商場亦有大量港人熟悉嘅餐廳如喜茶、探魚等，行完街仲可以步行約10分鐘去埋南山書城，行程非常豐富。
- 地址：深圳市南山區文心五路33號
- 營業時間：周日至四 10:00 – 22:00；周五至六 10:00 – 22:30
- 交通：深圳地鐵2/11號線「后海站」D1出口，步行約4分鐘。
4. 前海壹方滙 (最新商場/樂沙兒超市)
近年新開幕嘅前海壹方滙，面積足足有8萬平方米！
商場內設有巨型屏幕播放花海、森林影像，充滿大自然氣息。商場底層嘅大型平價超市「樂沙兒」（LeSuper）係掃貨熱點，不時有¥1精選貨品。鍾意潮物嘅朋友仲可以去「酷樂潮玩」同「超級黑膠工廠」尋寶。
- 地址：深圳市南山區聽海大道5059號
- 營業時間：10:00 – 22:00
- 交通：深圳灣口岸乘搭免費「寶安文旅專線」或M507快線至「桂灣地鐵站」。
5. 歡樂海岸 (5A景區/水舞煙花騷)
歡樂海岸唔單止係一個商場，更係國家5A級旅遊景區！
呢度集生態、文化、購物於一身，環境寬敞寫意。入夜後，大型水舞煙花騷《深藍秘境》喺水秀劇場上演，場面震撼！
場內仲有海洋奇夢館（水族館）同深圳灣海景，非常適合情侶拍拖或親子同遊。
- 地址：深圳市南山區白石路8號
- 營業時間：全天開放 (商舖及設施按個別時間)
- 交通：深圳地鐵9號線「深圳灣公園站」E出口，步行約3分鐘。
- 門票優惠：海洋奇夢館門票優惠
6. 睿印 RAIL IN (科技感商場)
想行啲與別不同嘅商場？睿印 RAIL IN就似一個大型科技藝術展覽館。商場中庭有自動開合嘅花卉燈飾「被吹散的蒲公英」，仲有好多環保主題嘅藝術裝置，周圍都係打卡位，充滿未來科技感。
- 地址：深圳市南山區白石四道與深灣二路交叉口
- 營業時間：10:00 – 22:00
- 交通：深圳地鐵2/9/11號線至「紅樹灣南站」A出口。
7. 益田假日廣場 (鄰近世界之窗)
呢個商場嘅最大優點係地理位置極佳，就在世界之窗地鐵站上蓋，鄰近歡樂谷同世界之窗兩大主題樂園。
玩完樂園，就可以直接過嚟醫肚同shopping，非常方便。商場內有真雪溜冰場、戲院同多間人氣餐廳。
- 地址：深圳市南山區深南大道9028號
- 營業時間：10:00-22:00
- 交通：深圳地鐵1/2號線「世界之窗站」B3口，步行約1分鐘。
8. 來福士廣場 (連接南山公園)
來福士廣場同南山公園融為一體，大家可以喺商場行完街、食完飯之後，就去公園散步，非常寫意。
商場集購物、休閒、美食於一身，地下街同外圍都有大量餐廳選擇，包括深圳燒烤榜首嘅「串殿」等，係消磨半日嘅好地方。
- 地址：深圳市南山區南海大道2163號
- 營業時間：10:00 – 22:00
- 交通：深圳地鐵9/12號線「南油站」E出口，步行約7分鐘。
深圳灣口岸美食：人氣美食餐廳推介
嚟深圳灣口岸又點少得食好西？深圳灣附近嘅南山區美食雲集，由網紅茶飲、地道川菜到高CP值日韓燒肉都應有盡有，以下為你精選幾間必試深圳灣美食！
1. 奈雪生活 (海岸城)
你可能飲過奈雪的茶，但「奈雪生活」你又去過未？全球首間「奈雪生活」登陸深圳海岸城，唔單止係一間茶飲店，更係一個集合咗16個品牌嘅多元藝文生活空間，連被譽為最美書店嘅「方所」都進駐其中！
喺度可以飲茶、飲咖啡、食輕食，享受一個文青悠閒嘅下午。
- 地址：海岸城購物中心2層201-205號
- 營業時間：10:00 – 22:30
- 交通：乘搭地鐵2/11號線至「后海站」E出口。
2. 太二老壇子酸菜魚
「太二」可以話係酸菜魚界嘅天花板，雖則價錢比一般酸菜魚貴少少，但質素絕對有保證！
佢哋標榜「酸菜比魚好吃」，用老壇酸菜配搭新鮮鱸魚，酸爽開胃，魚肉嫩滑無骨，令人一試難忘。深圳灣附近嘅寶能太古城就有分店，行完街去食就最方便。
- 地址：深圳市南山區中心路2233號寶能太古城B2
- 營業時間：星期一至五 11:00-14:00, 17:00-21:00; 星期六、日 11:00-21:00
- 交通：乘搭地鐵2號線至「海月站」B出口。
3. 幸福柚子碳火烤肉烤活鰻魚店
想用超抵價錢食到高質烤鰻魚？呢間韓式烤鰻魚店深受本地人同遊客歡迎，人均消費只需約¥80，就可以食到新鮮肥美、肉質彈牙嘅烤活鰻，配上自家製醬汁，味道一流！餐廳小菜仲可以無限添加，CP值爆燈！
- 地址：南山區現代城華庭創業路3036號東林教育二樓
- 營業時間：11:00 – 23:00
- 交通：地鐵9號線「南光站」A/B出口。
4. 同仁四季音樂主題餐廳
想食得清淡健康啲，主打椰子雞火鍋嘅同仁四季就係好選擇。湯底用新鮮椰青水，清甜潤喉，雞肉嫩滑。餐廳另一大賣點係有Live Band現場演奏，可以一邊聽歌一邊打邊爐，氣氛超好。佢哋嘅臘味煲仔飯都係必點名物！最正是海岸城分店24小時營業，幾夜肚餓都有得食！
- 地址：深圳市南山區海岸城保利文化廣場二樓
- 營業時間：24小時營業
- 交通：乘搭地鐵2/11號線至「后海站」E出口。
5. 十六小糖水鋪 (港風麻將枱特色)
行到攰想食糖水？呢間糖水舖風格超有特色，紅綠霓虹燈充滿港式風情，餐枱竟然係麻雀枱造型，打麻雀嘅朋友一定好有親切感！招牌「陳總特調」顏值超高，雙色冰粉球配上椰奶甜湯同各種小料，好食又好睇。另外「楊梅手搓冰粉」都係人氣之選，酸甜開胃，非常解暑！
- 地址：深圳市南山區創業路147號
- 營業時間：星期二至日 12:00 – 22:30
- 交通：地鐵12號線「南光站」B1出口，步行約20米。
深圳灣出發一日遊行程建議
有選擇困難症？唔知點樣plan行程？唔緊要，我哋根據唔同主題，為你設計咗三條由深圳灣口岸出發嘅深圳一日遊路線，跟住行就無錯！
【親子放電路線】歡樂海岸 → 萬象天地
- 上午：首先去歡樂海岸，參觀海洋奇夢館（Klook 預訂優惠門票），睇各種奇妙海洋生物。
- 中午：喺歡樂海岸揀一間湖景餐廳食Lunch。
- 下午：轉場去萬象天地，先同門口嘅打卡大象影相，然後帶小朋友去人氣室內遊樂園MELAND CLUB（Klook 預訂優惠門票）盡情放電。
- 傍晚：喺萬象天地食埋晚飯，再心滿意足咁返香港。
【文青打卡路線】南頭古城 → 南山書城 → 前海石公園
- 上午：第一站去南頭古城，喺歷史街區中穿梭，發掘特色文創小店同咖啡店，影夠文青相。
- 中午：喺古城內搵間特色餐廳解決午餐。
- 下午：搭車去南山書城，感受「深圳最美書店」嘅魅力，打個書釘。
- 傍晚：去南山前海石公園，欣賞無敵海景同絕美嘅海上日落，為一日嘅文青之旅畫上完美句號。
【購物美食路線】前海壹方滙 → 海岸城 → 太二酸菜魚
- 上午：過關後搭免費巴士直達最新商場前海壹方滙，先去「樂沙兒」超市掃平貨。
- 中午：喺壹方滙內眾多高質餐廳中揀一間食晏。
- 下午：再轉戰南山老牌商場海岸城，繼續Shopping，由國際品牌買到潮流小店。
- 傍晚：行到攰，就去附近嘅太二老壇子酸菜魚食返餐醒胃嘅酸菜魚，補充體力再返香港。
深圳灣口岸開放時間
深圳灣口岸並非24小時通關，計劃行程時記得要預留充足時間過關，避免「摸門釘」。
- 旅客通關服務時間：每日 06:30 – 24:00
- 溫馨提示：通往口岸的道路通常會喺口岸關閉前約30分鐘封閉，大家記得早少少出發，確保有足夠時間辦理出入境手續。
深圳灣口岸過關所需證件及流程
深圳灣口岸實施「一地兩檢」，大家只需在同一座旅檢大樓內，就可以一次過辦理香港出境同內地入境手續，過程快捷方便。
- 所需證件：香港居民通常需要攜帶有效的香港永久性居民身份證（或香港居民身份證）及回鄉證（港澳居民來往內地通行證）。
- 過關流程：抵達口岸後，按照指示前往出境大堂，使用e-道或傳統櫃位辦理香港出境手續，然後步行一小段路，即可到達內地入境區域，同樣使用e-道或櫃位辦理入境手續，完成後就正式進入深圳。
香港往返深圳灣交通攻略
由香港各區前往深圳灣口岸，選擇非常多，不論是巴士、小巴還是的士都一應俱全，非常方便。
專營巴士 (B線)
住在屯門、元朗、天水圍的朋友，搭B線巴士係最平靚正嘅選擇。
| 路線 | 起點/終點 | 收費 (HK$) |
|---|---|---|
| B2 | 元朗站公共運輸交匯處 – 深圳灣口岸 | $14.4 |
| B2P | 天慈邨巴士總站 – 深圳灣口岸 | $10.3 |
| B3 | 屯門碼頭 – 深圳灣口岸 (經屯門市中心) | $14.7 |
| B3A | 山景邨 – 深圳灣口岸 | $14.7 |
| B3X | 屯門市中心 – 深圳灣口岸 | $14.7 |
專線小巴
| 路線 | 起點/終點 | 收費 (HK$) |
|---|---|---|
| 618 | 天水圍 (天恩邨) – 深圳灣口岸 | $13.1 |
跨境巴士/直通車
如果想一程直達，唔駛煩轉車，可以選擇搭跨境巴士。永東巴士等營辦商提供由港島、九龍及新界多個站點直達深圳灣口岸的服務，車程大約30-45分鐘，帶住大件行李就最方便。
的士（市區/新界）
想點對點，享受最舒適嘅旅程，可以選擇搭的士。市區的士（紅色）同新界的士（綠色）都可以去到深圳灣口岸，但記得兩者的營運範圍同收費都唔同。
| 的士種類 | 營運範圍 |
|---|---|
| 市區的士（紅色） | 香港各區（東涌道及大嶼山南部除外） |
| 新界的士（綠色） | 主要為新界東北及西北地區，包括屯門、元朗、大埔、上水、粉嶺等。 |
深圳灣口岸市內接駁交通
過關後，由深圳灣口岸前往市區各大商場景點亦非常方便，除咗的士，仲有地鐵同多條巴士線選擇，當中更有免費巴士直達熱門商圈！
深圳地鐵13號線（直達口岸）
港人福音！深圳地鐵13號線一期已經開通，由口岸旅檢大樓行過去地鐵站只需約3分鐘，真正做到無縫交接。
13號線串連南山、寶安、光明三個區，無論你想去萬象天地、海岸城定係世界之窗，都可以輕鬆轉線到達，慳返好多時間！
免費穿梭巴士（寶安文旅專線）
想慳錢又想方便，就一定要識搭免費嘅「寶安文旅專線」！呢條線專為遊客而設，由深圳灣口岸出發，途經多個熱門深圳灣商場同景點，包括前海壹方滙、歡樂港灣等。
- 營運時間：週末假期及香港節假日
- 收費：免費
- 主要站點：途經桂灣地鐵站、寶安行政中心、歡樂港灣等。
其他主要巴士路線 (M507快線)
M507快線係另一條由口岸出發嘅便捷巴士線，經東濱隧道快速連接前海同寶安中心區，車費只需人民幣2蚊，CP值極高！
主要站點：深圳灣口岸A停車場、桂灣地鐵站、寶安行政中心等，方便前往萬象前海、壹方城等商場。
常見問題 (FAQ)
服務時間：09:00 – 20:00 (班次約30分鐘)
票價：一票制 ¥2
Q1: 深圳灣口岸過關後如何乘搭地鐵？
非常方便！過關後，只需跟隨指示步行約100米（約3分鐘），即可到達新開通嘅深圳地鐵13號線「深圳灣口岸站」。你可以從呢度搭地鐵，再轉乘其他線路輕鬆前往深圳好去處。
延伸閱讀：
Q2: 有免費巴士由口岸直達商場嗎？
有！喺週末及香港公眾假期，可以乘搭免費嘅「寶安文旅專線」，線路途經前海壹方滙、歡樂港灣等多個熱門商場及景點。
另外，收費嘅M507快線（¥2）亦可快速到達萬象前海、壹方城等商圈。
Q3: 除了巴士，有其他從香港市區到深圳灣口岸的方法嗎？
有好多選擇！你可以選擇搭跨境巴士（直通車），由香港市區多個地點一程直達口岸，非常適合攜帶大型行李嘅旅客。另外，亦可以選擇搭市區的士（紅色）或新界的士（綠色），享受點對點嘅舒適服務。
Q4: 深圳消費需要用什麼電子支付？
現時香港人喺深圳消費已非常方便。
香港版嘅電子錢包如 AlipayHK（支付寶香港）或 WeChat Pay HK（微信支付香港）已經可以直接喺內地大部分接受相關支付方式嘅商戶使用，App會自動將人民幣金額轉換成港幣結算，無需預先兌換人民幣或綁定內地銀行卡。
睇完呢篇超詳盡嘅深圳灣口岸通關及食買玩攻略，相信你已經對點樣規劃行程胸有成竹！
無論你想去最新商場掃貨、到文青景點打卡，定係同親朋好友大快朵頤，跟住我哋嘅推介同行程建議就無錯。
快啲Bookmark低呢篇懶人包，計劃你嘅下一個深圳週末快閃之旅啦！
深圳貓編 Sally，來自香港嘅90後女生，在家係貓奴，在外係社畜。放假鍾意周圍去，發掘唔同嘅地方。自從疫情通關後已北上深圳超過100次，鍾意深圳夠近夠方便、又平又好多嘢食！週末假期會去深圳行街、按摩、食嘢，整理成旅遊攻略分享。希望大家以後去深圳，都會嚟搵深圳貓，記得貓咪伴你行！
發表留言