【深圳親子好去處2026】親子遊終極攻略！精選40+親子景點/酒店/商場（附詳細行程及交通懶人包）

週末放假想帶小朋友北上放電，但又唔知有咩好玩？

深圳交通方便，而且深圳親子好去處選擇極多，無論係想去主題樂園、室內遊樂場定係親親大自然，都總有一款啱你心水！

深圳貓為你精心整合咗2026年最新最齊嘅深圳親子好去處懶人包，超過40個人氣景點，涵蓋主題樂園、室內遊樂場、親子商場、博物館等，仲有齊地址、交通、門票優惠同行程規劃，幫你輕鬆計劃一個完美嘅深圳親子遊！

深圳親子好去處：主題樂園及大型景區

想同小朋友盡情放電，主題樂園同大型景區就最適合不過！

由刺激機動遊戲到近距離接觸小動物，深圳嘅選擇絕對可以滿足大人細路嘅願望。

深圳歡樂谷

深圳最大嘅主題樂園之一，設有9大主題區同超過100項遊樂設施。

無論係追求刺激嘅「雪域雄鷹」過山車，定係適合小朋友嘅夢幻旋轉木馬，仲有瑪雅水公園，一家大細都可以玩足一日。

• 地址：深圳市南山區華僑城僑城西路
• 開放時間：09:30 – 21:30
• 交通：深圳地鐵1號線/2號線「世界之窗站」A出口，步行約3分鐘
• 門票優惠：按此預訂享優惠

世界之窗

深圳經典嘅微縮景區，以「一日遊遍世界」為主題，將全球著名地標如巴黎鐵塔、埃及金字塔濃縮於園區內，俾小朋友認識世界建築。除咗打卡影相，園內亦有機動遊戲同大型歌舞表演，內容豐富。

• 地址：深圳市南山區華僑城深南大道9037號
• 開放時間：09:00 – 21:30
• 交通：深圳地鐵1號線/2號線「世界之窗站」J出口，步行約3分鐘
• 門票優惠：按此預訂享優惠

深圳野生動物園

中國首家放養式野生動物園，可以近距離觀賞大熊貓、長頸鹿、東北虎等超過300種珍稀動物。最刺激嘅活動莫過於乘坐鐵籠觀光車進入猛獸谷，親手餵飼獅子老虎，絕對係一個難忘體驗。

• 地址：深圳市南山區西麗湖路4086號
• 開放時間：09:30 – 18:00 (最後入園 17:00)
• 交通：深圳地鐵7號線「西麗湖站」B出口，步行約5分鐘
• 門票優惠：按此預訂享優惠

小梅沙海洋世界

深圳最大嘅海洋主題公園之一，集科普教育同娛樂於一身。園區有五大主題展區，可以睇到白鯨、北極熊、企鵝等極地動物，仲有精彩嘅海豚表演，係海洋迷小朋友嘅必到之處。

• 地址：深圳市鹽田區小梅沙海濱旅遊區
• 開放時間：平日 10:00-17:30；週末及假日 09:30-18:00
• 交通：深圳地鐵8號線「小梅沙站」A/C出口，步行約8分鐘
• 門票優惠：按此預訂享優惠

歡樂海岸

一個集購物、餐飲、娛樂同藝術於一身嘅大型商業區，更係國家5A級旅遊景區。

區內有「海洋奇夢館」可以睇水母同海獅表演，夜晚仲有浪漫嘅音樂噴泉水秀，非常適合黃昏後嚟散步食飯。

• 地址：深圳市南山區白石路東8號
• 開放時間：24小時 (個別設施除外)
• 交通：深圳地鐵9號線「深圳灣公園站」E出口，步行約3分鐘
• 門票優惠：海洋奇夢館門票優惠

歡樂港灣

一個大型公園式商業街區，最大特色係擁有全深圳最高嘅「灣區之光」摩天輪，高達128米！夜晚摩天輪會亮起七彩燈光，配合音樂噴泉表演，景色非常壯觀，係打卡熱點。

• 地址：深圳市南山區白石路8號
• 開放時間：全日開放
• 交通：深圳地鐵5號線「臨海站」B2出口可直達
• 門票優惠：「灣區之光」摩天輪門票優惠

深圳親子景點：室內親子遊樂場

無論係炎炎夏日定係落雨天，親子遊樂場都係最佳嘅深圳室內好去處。場內有冷氣又夠安全，遊樂設施五花八門，絕對可以俾小朋友瘋狂放電！

延伸閱讀：【深圳室內好去處】逾50個地鐵沿線景點推介！親子/滑雪/按摩/雨天好去處全攻略

大型連鎖遊樂場 (Meland Club / 奈爾寶)

呢兩間係深圳頂級嘅連鎖室內遊樂場，規模大、設施新淨，每個場館都有唔同主題，俾小朋友沉浸式嘅玩樂體驗。

Meland Club

以「主題遊樂、美學鑒賞」為核心，打造模擬城市、超級迷宮、波波池等區域，分店遍佈萬象天地、深業上城等熱門商場。2024年10月更新開龍崗大運天地店，佔地超過三萬呎！（按此預訂優惠門票）

奈爾寶家庭中心 (Neobio)

同樣係人氣極高嘅親子樂園，致力打造充滿創意嘅互動空間，設有攀爬挑戰、職業角色扮演、手工創作等區域，啱晒唔同年齡層嘅小朋友。（按此預訂優惠門票）

運動探索及競技 (玩美攻略 / 就好潮玩 / 君昂童子軍)

如果小朋友活潑好動，呢類結合運動同科技嘅遊樂場就最適合不過，可以挑戰體能同反應！

玩美攻略 Wonder Meet

被譽為「室內遊樂天花板」，佔地10萬平方呎，集齊滑冰、保齡球、卡丁車、真人CS、VR遊戲等過百項設施，大人細路都啱玩。（按此預訂優惠門票）

就好潮玩體驗館

深圳首家綜合型數字運動潮玩館，有電子網球、電子棒球、大型蹦床區等超過30項設施，將科技同運動完美結合。（按此預訂優惠門票）

君昂童子軍

專為青少年設計嘅室內拓展訓練場，小朋友可以挑戰徒手攀爬、過吊橋等，訓練膽量同身體協調能力，家長可以喺場外放心睇住。

冰雪世界及溜冰場 (卡魯冰雪世界 / 海昌・樂漫冰雪王國)

想喺深圳體驗冰天雪地？冇問題！呢啲室內冰雪樂園可以俾你同小朋友一齊滑雪、玩冰，感受凍冰冰嘅樂趣。

卡魯冰雪世界

深圳最大嘅室內滑雪場，位於觀瀾湖。場內分為滑雪區同娛雪區，就算係初學者或者年紀較細嘅小朋友，都可以喺娛雪區玩雪圈滑坡、兒童雪橇等。（Klook 預訂優惠門票）

海昌・樂漫冰雪王國

華南首個東歐風格主題嘅冰雪樂園，佔地40,000呎。場内有五大主題區，包括冰雪城堡、霧凇森林等，打卡一流。（Trip.com 預訂優惠門票）

深圳親子賽車體驗 (SGP卡丁車 / 錕鵬卡丁車)

想體驗速度與激情？室內卡丁車場安全又刺激，啱晒好動嘅大朋友同小朋友。

SGP卡丁車俱樂部

擁有深圳最長嘅室內瀝青賽道，抓地力強，駕駛體驗感極佳。除咗賽車，場地仲有KTV、室內高爾夫等設施。（Klook 預訂優惠門票）

錕鵬卡丁車

位於福田區嘅專業室內卡丁車場，除咗可以賽車，仲可以玩射箭、親子DIY拉胚等，活動多元化。（Klook 預訂優惠門票）

特色主題體驗 (木育森林 / teamLab)

想玩啲文青啲、有特色啲嘅嘢？呢兩個場館將藝術、自然同科技結合，帶俾你與別不同嘅親子體驗。

木育森林 (Wooderful Land)

來自台灣嘅人氣木製遊樂園，以環保為理念。場內所有設施都係木造，例如飛機鞦韆、搖擺平衡木、保齡球等，寓教於樂。（按此預訂門票可享優惠）

teamLab共創！未來園

一個由光影打造嘅奇幻世界！小朋友可以同場景互動，喺綻放煙花嘅滑梯上滑下，感受科技與藝術嘅結合，激發無限創意。

室內動物樂園 (WOWO窩窩萌寵森友會 / 野恩動物樂園)

唔使日曬雨淋就可以同得意小動物近距離接觸！呢類室內動物樂園啱晒鍾意小動物嘅家庭。

WOWO窩窩萌寵森友會

可以同羊駝、水豚、龍貓等溫馴動物零距離互動、餵食同合照，集遊樂同科普教育於一身。（按此預訂門票可享優惠）

野恩動物樂園

位於龍崗萬達廣場內，集合動物園同兒童樂園，除咗可以親親萌寵，仲有兒童遊玩設施。（按此預訂門票可享優惠）

綜合娛樂城 (東門町歡樂城 / 極客森超樂場)

想一次過玩勻夾公仔、跳舞機、籃球機、VR遊戲？呢啲大型綜合娛樂城就係你嘅不二之選。

東門町歡樂城

位於羅湖東門，樓高5層，集娛樂美食於一身。有高空單車、4層樓高旋轉滑梯、卡丁車、密室逃脫等，玩足一日都唔會悶。

極客森超樂場

佔地廣闊，擁有多款全新娛樂設施，由賽車、推金幣機到親子遊戲應有盡有，適合唔同年齡層。（按此查看設施詳情）

親子友善商場食買玩攻略

家長們最怕行街小朋友會悶，但深圳好多大型商場都非常親子友善，唔單止有專為小朋友而設嘅遊樂區，仲有齊各式各樣嘅餐廳同商店，絕對可以滿足一家大細「食、買、玩」三個願望！

深業上城

以紅黃白為主色調嘅歐式小鎮風格建築，令深業上城成為打卡勝地。商場連接住蓮花山公園，可以先喺戶外散步再返商場食嘢。室內有樂高專賣店同人氣遊樂園MELAND CLUB，小朋友一定唔會悶！餐廳選擇亦多，例如鳳凰四季椰子雞、漁語魚酸菜魚等都喺度有分店。

• 地址：深圳市福田區皇崗路5001號
• 交通：深圳地鐵10號線「冬瓜嶺站」A出口，步行約3分鐘

萬象天地

位於南山區，係一個結合街區同商場嘅大型綜合體，店舖多達400間。商場同樣有超人氣嘅MELAND CLUB俾小朋友放電。餐廳選擇極多，羲和雅苑、慶春樸門、奈雪的茶等網紅店都喺齊度，絕對唔怕搵唔到嘢食。

• 地址：深圳市南山區科發路19號
• 交通：深圳地鐵1號線「高新園站」A出口，步行約2分鐘

壹方天地

曾號稱深圳最大嘅商場，分為ABCDE五個區，面積超級大！

A區有好多親子設施，例如室內貓Cafe、鴨小七自然探索樂園，仲有來自日本嘅大型室內遊樂場「朗玩ROUND1」，裡面有齊卡啦OK、保齡球、彈床等超過40種項目，大人細路都啱玩！

• 地址：深圳市龍華區龍華街道4020號
• 交通：深圳地鐵4號線「龍華站」A出口，步行約1分鐘

福田星河COCO Park

融合咗公園同購物中心嘅設計，空間感十足。

商場特設大型戶外樂園同室內兒童樂園「星躍領動」，俾小朋友盡情跑跳。美食方面，進駐超過20間網紅食店，包括太二酸菜魚、KUMO KUMO等，選擇超多。（按此閱讀更多深圳美食推介）

• 地址：深圳市福田區福華三路
• 交通：深圳地鐵1號線/4號線「購物公園站」C出口，步行約2分鐘

中洲灣 C Future City

以「藝術、科技、自然」為主題，商場佈置充滿未來感。最矚目嘅係設有teamLab常設館，五光十色嘅光影藝術裝置啱晒幫小朋友打卡影靚相。商場仲有好多動漫玩具專門店，小朋友一定鍾意。

• 地址：深圳市福田區濱河大道9283號
• 交通：深圳地鐵9號線「下沙站」B出口，步行約5分鐘

KK One

位於福田下沙，同C Future City相連。商場除咗潮流服飾，仲有大型日本家品店。

親子設施方面，有親子遊戲坊、電子遊戲中心等。餐廳方面，有網紅燒肉店「犀先生·燒肉」同周杰倫開嘅「Mr.J Diner」。

• 地址：深圳市福田區濱河大道9289號
• 交通：深圳地鐵9號線「下沙站」B出口，步行約3分鐘

益田假日廣場

地理位置極佳，鄰近歡樂谷同世界之窗，由地鐵站行1分鐘就到。玩完成日想搵地方食飯醫肚，呢度就最方便。

商場內有真冰溜冰場、電影院同多間人氣餐廳，係一個食買玩俱全嘅好地方。

• 地址：深圳市南山區深南大道9028號
• 交通：深圳地鐵1號線/2號線「世界之窗站」B3出口，步行約1分鐘

親親大自然及公園推介

想遠離城市煩囂，帶小朋友呼吸新鮮空氣？深圳亦有唔少大型公園同自然景點，俾一家大細跑跑跳跳，舒展身心。

青青世界農場

一個以農業同觀光為主題嘅4A級生態旅遊景點。園區內有熱帶雨林、蝴蝶谷、瓜果園等特色景區，小朋友可以親近大自然。

此外，仲可以參與陶藝製作、環保藝術設計等親子工作坊，體驗農家樂。

• 地址：深圳市南山區月亮灣青青路1號
• 開放時間：平日 08:30 – 17:30；週末 08:00 – 18:00
• 交通：深圳地鐵5號線「荔灣站」B出口，步行約13分鐘

仙湖植物園

被評為國家4A級風景區，園區超大，分為天上人間、湖區、廟區、沙漠植物區等多個景區。

小朋友可以欣賞到唔同氣候環境下嘅植物，學習生態知識，弘法寺亦喺園區內，係一個洗滌心靈嘅好地方。

• 地址：深圳市羅湖區仙湖路160號
• 開放時間：08:00 – 18:00
• 交通：深圳地鐵2號線/8號線「仙湖路站」C2出口

深圳大鵬半島國家地質公園

以壯觀嘅火山岩同海岸地貌聞名，園內有博物館，可以俾小朋友學習地質知識，了解宇宙同火山嘅形成。同時可以欣賞到絕美嘅海岸風光，係一個集科普同觀光於一身嘅景點。

• 地址：深圳市大鵬新區南澳街道新大社區地質公園路1號
• 開放時間：09:30 – 16:30
• 交通：建議自駕或乘坐巴士M423路到「國家地質公園站」

蓮花山公園

位於深圳市中心最大嘅城市公園之一，有大片草坪，最適合一家人嚟野餐、放風箏。

山頂廣場仲有鄧小平銅像，可以俯瞰福田中心區嘅景色。呢度係免費入場，係週末悠閒活動嘅首選。

• 地址：深圳市福田區紅荔路6030號
• 開放時間：全天開放
• 交通：深圳地鐵3號線/4號線「少年宮站」F1出口

寓教於樂博物館及文化設施

邊個話親子活動一定係放電？帶小朋友去博物館同藝術館，喺玩樂之中學習新知識，一樣可以好有趣！

深圳好多博物館都充滿互動元素，而且唔少係免費入場！

深圳博物館 (歷史民俗館/古代藝術館)

深圳博物館有兩個館，都位於市民中心附近，啱晒一次過參觀。

歷史民俗館可以俾小朋友了解深圳嘅歷史同民俗文化，仲有豐富嘅動物標本。古代藝術館就展出古代嘅陶瓷、青銅器等，可以帶小朋友穿越時空，感受中華文化藝術。

• 地址：深圳市福田區福中路市民中心A區
• 開放時間：10:00 – 18:00 (週一休館)
• 交通：深圳地鐵2號線/4號線「市民中心站」B出口
• 門票：免費

深圳紅立方 (龍崗科技館)

全深圳最大嘅科普樂園，位於龍崗區。館內有大量視覺科技同實體互動遊戲，主題圍繞宇宙、航天科技同未來生活，小朋友可以親自動手做實驗，激發對科學嘅興趣，最重要係免費入場！

• 地址：深圳市龍崗區龍翔大道8028號
• 開放時間：09:30 – 18:00 (週一休館)
• 交通：深圳地鐵3號線「龍城廣場站」D出口，步行約5分鐘
• 門票：免費 (需預約)

兒童探索館

位於福田婦兒大廈，係一個專為兒童設計嘅探索館。

館內有超過100種互動展品，分為自然世界、活力城市、水的故事、我的身體等6大主題區，小朋友可以透過角色扮演體驗唔同職業，趣味性十足。

• 地址：深圳市福田區景田路78號婦兒大廈
• 開放時間：10:00 – 20:00 (週一休館)
• 交通：深圳地鐵2號線/9號線「景田站」A出口

深圳市當代藝術與城市規劃館

場館建築本身已經係一件藝術品，設計非常獨特，打卡一流。

館內主要展出當代藝術作品同城市規劃相關展覽，可以培養小朋友嘅藝術觸覺，同時了解深圳呢個城市嘅發展歷史。

• 地址：深圳市福田區福中路184號
• 開放時間：10:00 – 18:00 (週一休館)
• 交通：深圳地鐵3號線/4號線「少年宮站」A2出口
• 門票：免費 (需預約)

深圳大劇院

想培養小朋友嘅藝術修養，可以帶佢哋去深圳大劇院欣賞表演。

劇院經常舉辦適合小朋友觀看嘅兒童劇、音樂會、舞蹈表演等，係一個感受藝術氛圍嘅好地方。

• 地址：深圳市羅湖區深南東路5018號
• 開放時間：根據演出時間開放
• 交通：深圳地鐵1號線/2號線「大劇院站」B出口

深圳親子酒店住宿推介

如果想玩足兩日一夜，揀一間高質嘅親子酒店就非常重要！

深圳好多酒店都有專為家庭而設嘅設施，例如兒童遊樂室、親子主題房、戶外泳池等，大人細路都可以盡情放鬆，享受家庭樂。

深圳蛇口希爾頓南海酒店

酒店位於蛇口海灣，鄰近海上世界，景色開揚。房間同設施大多面向無敵海景，令人心曠神怡。

酒店有齊室內外泳池、兒童遊樂區同大草地，動靜皆宜，非常適合家庭度假。

• 地址：深圳市南山區望海路1177號
• 賣點：無敵海景、鄰近海上世界、設施齊全
• 預訂優惠：按此查看房價及預訂

深圳硬石酒店 (Hard Rock Hotel)

以搖滾音樂為主題嘅特色酒店，位於觀瀾湖，鄰近卡魯冰雪世界。

酒店設有多款親子主題客房，房內有卡通佈置同娛樂設施，就算落雨留喺酒店都唔會悶，充滿童真。

• 地址：深圳市龍華區觀瀾高爾夫大道9號
• 賣點：搖滾主題獨特、親子客房選擇多、鄰近觀瀾湖景點
• 預訂優惠：按此查看房價及預訂

深圳威尼斯英迪格酒店

充滿濃厚歐陸風情嘅酒店，好似置身歐洲古堡一樣。酒店毗鄰歡樂谷、世界之窗等大型主題樂園，地理位置極之方便。室內嘅圓形天窗泳池亦係酒店一大亮點，打卡一流。

• 地址：深圳市南山區華僑城深南大道9026號
• 賣點：歐式建築風格、鄰近世界之窗及歡樂谷、交通方便
• 預訂優惠：按此查看房價及預訂

深圳富苑皇冠假日套房酒店

位於羅湖區，鄰近國貿地鐵站同羅湖口岸，地段優越，方便四圍去。

酒店周邊有大型商場同各式餐廳，行街食嘢都好方便。設施方面有泳池同兒童遊樂室，大人細路各取所需。

• 地址：深圳市羅湖區南湖路3018號
• 賣點：鄰近羅湖口岸、交通便利、周邊食買玩方便
• 預訂優惠：按此查看房價及預訂

深圳大梅沙京基洲際度假飯店

鍾意陽光與海灘嘅家庭，呢間酒店就最啱！

酒店正對大梅沙沙灘，隨時可以同小朋友去玩沙玩水。酒店仲會定時舉辦唔同嘅親子工作坊，節目豐富，保證小朋友唔會悶。

• 地址：深圳市鹽田區大梅沙鹽葵路9號
• 賣點：直達大梅沙沙灘、海景房、豐富親子活動
• 預訂優惠：按此查看房價及預訂

按小朋友年齡/興趣分類

深圳親子好去處選擇太多，花多眼亂？

唔緊要，深圳貓已經幫你根據小朋友嘅唔同年齡同興趣分好類，方便你一目了然，揀出最適合你家庭嘅景點！

適合0-3歲幼兒的景點

帶BB仔出遊，最緊要安全、舒適、唔好太刺激。呢啲地方就最啱：

• 奈爾寶/Meland Club：大型室內遊樂場通常有專為幼兒而設嘅軟墊區、感官遊戲區，乾淨又安全。
• 兒童探索館：設有「親親寶貝」及「感官小屋」等專區，專為低幼齡兒童設計。
• 木育森林：木製玩具質感好，冇咁多聲光電刺激，適合幼兒探索。（Klook 預訂優惠門票）
• 各大公園 (蓮花山/仙湖)：帶BB車去散散步，呼吸新鮮空氣，喺草地上面坐下野餐，輕鬆寫意。

適合4-8歲兒童的景點

呢個年紀嘅小朋友精力旺盛，對世界充滿好奇，最啱去啲可以跑跑跳跳，又有互動元素嘅地方。

• 深圳野生動物園：近距離睇動物，滿足好奇心。（Klook 預訂優惠門票）
• 卡魯冰雪世界 (娛雪區)：唔使學滑雪，淨係玩雪兜、堆雪人都夠開心。（Klook 預訂優惠門票）
• 青青世界農場：親親大自然，參加親子工作坊。（Klook 預訂優惠門票）
• 深圳紅立方：互動科學遊戲，喺玩樂中學習。
• teamLab：光影互動藝術，俾小朋友發揮創意。

適合9歲以上大童的景點

大個啲嘅小朋友需要更多挑戰同刺激感，靜態嘅活動可能已經滿足唔到佢哋！

• 深圳歡樂谷：挑戰各種過山車同機動遊戲（Klook 預訂優惠門票）
• 玩美攻略/就好潮玩：集合卡丁車、VR、數字運動等潮玩，啱晒鍾意挑戰嘅青少年。
• 卡魯冰雪世界 (滑雪區)：可以正式學下滑雪，挑戰新技能。（Klook 預訂優惠門票）
• 君昂童子軍：室內攀爬拓展，考驗體能同膽量。
• 東門町歡樂城：高空單車、密室逃脫等刺激玩意，啱晒一班朋友去玩。

喜歡動物的小朋友

• 戶外大型：深圳野生動物園 (種類最齊全)、小梅沙海洋世界 (海洋生物)。
• 室內小型：WOWO窩窩萌寵森友會 (親密互動)、野恩動物樂園 (商場內方便)。
• 農場類：青青世界農場 (鄉村田園風)。

活潑好動放電之選

• 極限挑戰：深圳歡樂谷、東門町歡樂城、玩美攻略。
• 運動競技：君昂童子軍、SGP卡丁車、就好潮玩。
• 冰雪運動：卡魯冰雪世界、海昌・樂漫冰雪王國。
• 大型遊樂場：Meland Club、奈爾寶家庭中心。

深圳親子遊行程懶人包

plan行程最頭痛？唔使驚，深圳貓為你準備咗幾條精選路線，無論你係想即日來回定係玩深圳兩日一夜，甚至係plan定雨天備案，都可以輕鬆出發！

一日遊精選路線 (東門/福田/南山)

深圳親子路線一：羅湖東門區 – 動感娛樂日

適合對象：喜歡熱鬧、追求刺激玩意嘅家庭。

• 上午：羅湖口岸過關 → 喺附近食個廣式早茶（如：點都德）。
• 中午至下午：去「東門町歡樂城」，玩盡高空單車、卡丁車、VR遊戲。
• 傍晚：行東門步行街，掃街食小食，再搵間餐廳食晚飯（如：姚姚酸菜魚）。

深圳親子路線二：福田中心區 – 文青探索日

適合對象：想動靜結合，集玩樂、購物與藝術於一身嘅家庭。

• 上午：福田口岸過關 → 去「深業上城」，喺歐陸風情小鎮打卡，再到MELAND CLUB放電。
• 中午：喺深業上城享用午餐（如：鳳凰四季椰子雞）。
• 下午：去「深圳市當代藝術與城市規劃館」或「深圳博物館」，俾小朋友感受藝術同歷史氛圍 (免費入場！)。
• 晚上：到COCO Park或卓悅中心食晚飯，再喺附近行街。

深圳親子路線三：南山華僑城 – 主題樂園日

適合對象：目標清晰，主攻大型主題樂園嘅家庭。

• 全日：深圳灣口岸過關 → 搭車直去華僑城區，「深圳歡樂谷」或「世界之窗」二選一，玩足全日！
• 晚餐：玩完可以到附近嘅「益田假日廣場」，超多餐廳選擇，非常方便。

深圳親子2日1夜週末遊行程

Day 1：觀瀾湖動感探索

• 上午：福田口岸過關，搭地鐵4號線直達觀瀾湖站。
• 中午至下午：去「卡魯冰雪世界」體驗滑雪同玩雪。
• 傍晚：入住「深圳硬石酒店」，享受酒店設施。
• 晚上：喺觀瀾湖新城搵食，選擇豐富。

Day 2：南山親親動物與自然

• 上午：酒店Check-out後，搭車去「深圳野生動物園」，同動物作近距離接觸。
• 中午：喺動物園內餐廳簡單午膳。
• 下午：去「歡樂海岸」行下，參觀「海洋奇夢館」或喺人造沙灘玩樂。
• 傍晚：喺歡樂海岸食埋晚飯，欣賞完水秀表演後，經深圳灣口岸回港。

深圳親子雨天備案行程

如果天公不造美，唔使驚！深圳有大量室內好去處，Plan B一樣精彩！

• 玩法一 (大型商場)：揀個大型親子商場，如深業上城、萬象天地或壹方天地，裏面有齊遊樂場 (Meland Club)、餐廳、商店，可以消磨一整日。
• 玩法二 (室內樂園)：主攻一個大型室內遊樂場，例如「玩美攻略」，過百樣設施玩足幾個鐘都唔會厭。
• 玩法三 (博物館之旅)：帶小朋友行博物館，例如深圳紅立方、深圳博物館、兒童探索館，全部都係室內，又有教育意義。

延伸閱讀：【深圳室內好去處】逾50個地鐵沿線景點推介！親子/滑雪/按摩/雨天好去處全攻略

北上深圳親子遊實用攻略

帶住小朋友出門，準備功夫一定要做足！睇埋以下幾個北上親子遊實用貼士，保證你旅途更順暢！

交通方式 (高鐵/直通巴/地鐵)

高鐵

由西九龍站出發，最快14分鐘到福田口岸，18分鐘到深圳北站。適合帶住細BB、追求舒適快捷嘅家庭，唔使同人逼。（按此預訂高鐵車票）

直通巴士

港九新界都有上車點，可以直達各大口岸甚至景點、深圳酒店，一程過唔使轉車，啱晒帶住好多行李嘅家庭。（按此預訂直通巴士）

港鐵轉深圳地鐵

最經濟實惠嘅選擇，經羅湖或落馬洲口岸過關後，就可以無縫轉乘深圳地鐵，網絡覆蓋大部分景點，非常方便。

延伸閱讀：【香港深圳交通】最平$9.9起！高鐵/巴士/MTR等6大方法時間價錢、口岸選擇懶人包

內地電話卡/數據Sim卡

去到內地，上網同通訊非常重要，無論係用地圖、Call車定係用電子支付都需要數據。建議預先準備：

• 一卡兩號/內地副號：香港電訊商提供嘅漫遊數據plan或者一卡兩號服務，可以直接用香港電話號碼接收內地短訊（例如餐廳排隊驗證碼），最方便。
• 內地Sim卡/eSIM：可以喺鴨寮街、網上旅遊平台（如Klook/KKday）或者過關後購買。eSIM更加方便，唔使換實體卡，掃個QR Code就用得。
• 門票Sim卡優惠：按此查看深圳數據Sim卡/eSIM優惠

電子支付方式 (WeChat Pay/AlipayHK)

現時內地消費基本上都係用電子支付，連街邊小食檔都好少收現金。香港人最常用嘅係：

• AlipayHK (支付寶香港)：開通跨境支付功能後，喺內地見到「支付寶」logo就可以直接用港幣俾錢，App會自動換算匯率，非常方便。
• WeChat Pay HK (微信支付香港)：用法同AlipayHK一樣，開通後見到「微信支付」logo嘅商戶都用得。
• 溫馨提示：出發前記得先做好身份認證同增值，亦可以綁定信用卡方便大額消費。

景點門票優惠及預訂方法

唔想去到門口先排長龍買飛？好多景點門票都可以預先喺網上買定，仲隨時有優惠！

• 網上旅遊平台：Trip.com、Klook、KKday等平台經常有早鳥優惠、套票優惠，或者港澳居民限定優惠，分分鐘平過現場買。
• 官方渠道預約：部分免費景點（如博物館、公園）需要透過官方微信公眾號進行實名預約，計劃行程時記得提早搞掂。

常見問題 (FAQ)

深圳親子景點有哪些推薦？

深圳親子景點非常多元化，主要可以分為幾大類：

• 主題樂園：深圳歡樂谷、世界之窗
• 動物園/水族館：深圳野生動物園、小梅沙海洋世界
• 室內遊樂場：Meland Club、奈爾寶、玩美攻略
• 特色體驗：卡魯冰雪世界、teamLab、木育森林
• 大自然/公園：仙湖植物園、青青世界農場
• 博物館：深圳紅立方、兒童探索館

深圳有哪些免費的親子好去處？

深圳有好多高質素又免費嘅親子景點，非常抵玩！包括：

• 博物館類：深圳博物館、深圳紅立方、深圳市當代藝術與城市規劃館。（注意：通常需要喺官方微信公眾號提早預約）
• 公園類：蓮花山公園、深圳灣公園。
• 商場：好多大型商場（如深業上城）嘅公共空間設計得好靚，淨係去行下打卡都好舒服。

去深圳親子遊有什麼注意事項？

帶小朋友北上，有幾點要特別注意：

1. 證件：確保小朋友嘅回鄉證未過期。
2. 交通：假日過關同坐地鐵人都會比較多，要睇實小朋友。BB車喺部分舊地鐵站可能冇咁方便，要有心理準備。
3. 飲食：盡量選擇大型連鎖餐廳或商場內嘅食肆，衛生較有保證。可以自備啲小朋友食開嘅零食同水。
4. 支付同通訊：預先開通電子支付同準備好上網卡。
5. 藥物：帶備一些平安藥，如退熱貼、腸胃藥、蚊怕水等以備不時之需。

推薦哪些性價比高的深圳親子酒店？

想住得舒服又唔想太貴，可以考慮：

• 深圳富苑皇冠假日套房酒店：位於羅湖，鄰近口岸，交通食買玩都方便。（Trip.com 預訂優惠住宿）
• 深圳硬石酒店：位於觀瀾湖，親子主題房好有特色，適合去觀瀾湖一帶玩嘅家庭。（Trip.com 預訂優惠住宿）

如果預算鬆動啲，想享受度假feel，可以選擇深圳蛇口希爾頓南海酒店或深圳大梅沙京基洲際度假飯店，有無敵海景同豐富親子設施。

睇完以上超過40個深圳親子好去處，相信各位爸爸媽媽已經有齊心水目的地！無論係想去主題樂園瘋狂放電，定係去文青博物館寓教於樂，呢份超詳盡攻略都幫到你。快啲參考我哋嘅行程懶人包，計劃你嘅下一個週末深圳親子快閃之旅啦！