【深圳硬石酒店自助餐】人均$1XX起任食海鮮/烤全羊、直擊8大回本區！附住宿餐飲套票、交通懶人包

近年港人北上消費蔚然成風，想用至抵價錢享受酒店級數嘅自助餐？

深圳硬石酒店（Hard Rock Hotel）嘅自助餐絕對係CP值極高嘅選擇，最平 $1XX 起就可以任食烤全羊、海鮮、打邊爐，甚至紅白酒任飲，非常超值！

今次小編為大家整合嘅深圳硬石酒店自助餐全攻略，會由8大必食區開始，詳細介紹有咩回本美食，再教大家點樣預訂最抵、點樣由香港點對點坐地鐵直達酒店。

仲會直擊埋超有特色嘅住宿體驗同周邊玩樂，無論係純粹食餐飯定係親子兩日一夜遊都啱睇！

👉🏻【Klook 預訂優惠】深圳硬石酒店自助餐優惠

【深圳硬石酒店自助餐】晚餐直擊 | 8大必食區回本位

深圳硬石酒店自助餐（位於5樓Sessions餐廳）嘅食物種類非常豐富，由戶外炭燒、冰鎮海鮮，再到一人一鍋火鍋，應有盡有。

即刻帶大家睇勻8大必食區，睇下點樣食先最易回本！

1. 戶外炭燒區：烤全羊、燒生蠔

深圳硬石酒店自助餐嘅重頭戲一定係戶外BBQ區！

師傅會喺炭火上即席燒製各種美食，雖然會比較熱，但食物嘅焦香味真係非常吸引。

• 烤全羊： 全晚嘅焦點所在！羊肉烤到外皮香脆，內裏軟嫩多汁，完全無羶味，絕對係必食回本位。
• 即開即燒生蠔： Size唔算細，非常新鮮，不過通常有人流管制，每次限取兩隻。
• 其他燒烤： 仲有燒雞、羊架、各類肉扒同串燒等等。

2. 冰鎮海鮮區：翡翠螺、三點蟹、凍蝦

海鮮控都唔會失望！海鮮選擇包括翡翠螺（非常大隻）、三點蟹、凍蝦、青口、瀨尿蝦及其他貝殼類。

雖然無酒店自助餐常見嘅長腳蟹或龍蝦，但以呢個價錢嚟講，選擇絕對夠誠意。

3. 一人一鍋火鍋區：麻辣/清湯湯底

估唔到食自助餐仲可以打邊爐！每人都有一個獨立小火鍋，乾淨又衛生。

湯底可選麻辣湯底或清湯湯底。火鍋配料則提供手切羊肉、手切牛肉、牛胸爽、手打牛丸、手打魚丸、鴨血、田雞、黃骨魚、各款海鮮等。

4. 日式風味：刺身及壽司區

日式選擇方面比較精簡，主打新鮮。刺身有4款，而壽司全部都係火炙過嘅熟壽司，啱晒唔食生嘢嘅朋友。

5. 即煮粉麵區：手工拉麵、刀削麵

粉麵檔係另一亮點，師傅會喺你面前即叫即拉即煮，夠晒煙韌彈牙。

麵食選擇包括手工拉麵、刀削麵、韓式冷麵，食客可以自由選配料，例如蘿蔔牛腩、番茄炒蛋、肉燥等。

6. 特色熱盤區：流動片皮鴨車、芝士焗榴槤

熱盤區充滿驚喜，除咗一系列中西式熱葷，仲有啲坊間少見嘅特色菜。

• 流動片皮鴨車： 儀式感滿滿！師傅會推住餐車逐枱服務，想食幾多件同佢講就得。
• 榴槤忘返： 必試芝士焗榴槤同榴槤Pizza，非常香濃！另外亦有芝士焗菠蘿。
• 順德主題菜： 餐廳會不時更換主題，例如之前就推出過泰椰豬肚雞、順德魚生等菜式。

7. 精緻甜品區：朱古力噴泉、多款蛋糕

食完主菜，記得留肚俾甜品！選擇非常多，由西式蛋糕到中式糖水都有。

• 打卡必備： 小朋友最愛嘅朱古力噴泉配棉花糖同水果。
• 蛋糕款式： 吉士撻、抹茶蛋糕、芝士蛋糕、Tiramisu、芒果蛋糕等十幾款。
• 糖水： 楊枝甘露、香芋西米露、紅豆沙等。

8. 飲品及酒類區：任飲啤酒紅白酒

飲品區絕對係另一回本位，酒鬼們唔好錯過！

• 酒精飲品： 任飲麒麟啤酒、紅酒、白酒。
• 非酒精飲品： 各式汽水、檸檬茶、酸梅湯、果汁等。

同場加映：現場樂隊表演 Live Band

作為音樂主題酒店，Live Band當然唔少得。每晚6:30開始，就會有駐場歌手獻唱，氣氛一流，為你嘅自助餐體驗增添一份搖滾色彩！

【深圳硬石酒店自助餐】自助早餐體驗

如果係深圳硬石酒店嘅住客，大部分住宿套票都已包含自助早餐。

早餐時段明顯比晚餐多人，食物選擇同樣「穩陣」，唔會有太大驚喜，但質素絕對對得住價錢。

👉🏻 Klook 預訂住宿餐飲套餐 | KKday 預訂住宿餐飲套餐

1. 特色美食：即製皺皮腸粉、生滾粥

早餐嘅最大亮點，莫過於有即叫即製嘅熱食，夠晒鑊氣。

• 即製腸粉： 唔係太多酒店早餐有嘅鐵板皺皮腸粉，雖然只係普通蛋肉腸，但新鮮熱辣，非常滑溜。
• 生滾粥： 即叫即煮，可以自選配料，暖胃之選。

2. 中西式及麵包糕點選擇

除咗特色美食，其他中西式選擇亦相當齊全。

• 中式： 白粥、皮蛋瘦肉粥、小米粥、點心、炒粉麵、茶葉蛋、豆腐花等。
• 西式： 腸仔、煙肉、煎蛋、沙律、乳酪、牛奶、粟米片等。
• 麵包糕點： 選擇出品質素唔錯，質感軟熟，連法式多士、窩夫、肉鬆小貝都有得食。

【深圳硬石酒店自助餐】價錢收費、餐廳資訊及預訂優惠

嚟到深圳硬石酒店自助餐，最平人均 $150 左右就可以任食烤全羊、海鮮、仲有火鍋同紅白酒任飲，CP值極高！

以下是深圳硬石酒店自助餐價錢收費、餐廳資訊及預訂優惠，供大家參考。

【深圳硬石酒店自助餐】餐廳基本資訊

• 餐廳名稱：Sessions全日制餐廳
• 地址：深圳市龍華區高爾夫大道9號硬石酒店5樓
• 自助餐供應時段：
  • 自助早餐：6:30 – 10:30
  • 自助午餐：11:30 – 14:30
  • 自助晚餐：18:00 – 21:00

預訂方法及貼士

酒店自助餐非常受歡迎，特別係週末同假期。

就算經網上平台買咗自助餐券，都建議大家提前打電話去酒店餐廳訂位，確保到埗時有位。

如果想坐近窗邊或者Live Band舞台前嘅靚位，就更加要提早預約啦！

【交通指南】如何前往深圳硬石酒店？

好多人一聽到「觀瀾湖」就覺得好遠，但其實由香港出發去深圳硬石酒店非常簡單，地鐵直達，唔駛點駁車，對於香港旅客嚟講絕對稱得上方便。

最直接嘅方法就係經福田口岸過關。過關後直駁深圳地鐵，唔駛日曬雨淋。

1. 深圳地鐵4號線直達 (觀瀾湖站D出口)

• 路線： 於福田口岸站乘搭深圳地鐵4號線（往牛湖方向）。
• 車程： 一程過直達，中途無需轉線，坐到尾二嘅「觀瀾湖站」落車，車程大約47分鐘。
• 出口： 由 D出口 上地面，一出就會見到酒店標誌性嘅大結他。向後行再上右邊樓梯就係酒店入口，全程步行約2分鐘。

2. 自駕泊車資訊

如果選擇自駕前往，酒店設有停車場。有關收費及泊車優惠詳情，建議直接向酒店查詢。

【深圳硬石酒店自助餐】常見問題 (FAQ)

首次到訪深圳硬石酒店享用自助餐的客人，通常都會有不少疑問。

深圳貓為大家整合了深圳硬石酒店自助餐的常見問題和答案，讓大家在出發前先了解更多資訊！

Q. 深圳硬石酒店自助餐值得去嗎？

絕對值得！以 $1XX 嘅價錢，可以任食烤全羊、海鮮、打邊爐，仲有紅白酒啤酒任飲，質素有酒店級保證，CP值非常高。

無論係專程去食，定係作為深圳 staycation 都好適合。

Q. 適合帶同長者或小朋友嗎？

非常適合。酒店本身就係深圳親子酒店，設有兒童俱樂部、親子烘焙班等設施。

自助餐食物選擇多樣，由熱盤、海鮮到甜品都一應俱全，而且有即煮粉麵、生滾粥等，能滿足唔同家庭成員嘅口味。

Q. 如何預約才能確保有位？

強烈建議提前預約。

即使已在網上平台（例如 Klook）購買餐券，亦最好打電話到酒店Sessions餐廳（+86 755 3395 2888）確認及預留座位，特別是週末及公眾假期，以免摸門釘。

Q. 購買住宿套票可以延遲退房嗎？

可以。根據經驗，部分經由 Klook、KKday 等平台預訂嘅住宿套票，可以享有延遲退房至下午3點嘅禮遇。

不過具體要視乎你所購買嘅套票條款而定，預訂時記得睇清楚詳情。

【同場加映】深圳硬石酒店住宿套餐詳情（優惠住宿+自助餐套票)

深圳硬石酒店位於觀瀾湖度假區，周邊設有滑雪、彈床、海洋世界、手作體驗和大型商場等親子娛樂設施，即日來回未必玩得完！

如果有時間到深圳快閃兩日一夜，唔少家庭都會選擇深圳硬石酒店的住宿 + 自助餐優惠套票。

例如 Klook 就曾推出超值豪華房+美食套餐，套餐包含2日1夜住宿、自助早餐、自助晚餐、兒童烘焙課程以及趣味魔法實驗，只須 $1,298（兩大一小），超抵玩！

👉🏻 Klook 查看住宿餐飲套票 | KKday 查看住宿餐飲套票

【深圳硬石酒店】自助餐 vs. 住宿餐飲套餐點揀好？

如果想喺深圳硬石酒店住一晚，經 Klook 或 KKday 預訂通常最方便優惠，主要有兩種選擇：

• 淨自助餐券： 純粹想上去食餐飯嘅朋友，可以直接買餐券，簡單方便（Klook 預訂算助餐優惠）
  
• 住宿套票： 如果想玩盡啲，可以考慮「住宿 + 自助早、晚餐」套票，計返人均都只係 $4XX 起，仲有機會包埋親子烘焙班等活動，非常適合家庭客，部分套票更可享延遲退房至下午3點，可以瞓到自然醒再慢慢歎個早餐！

預訂套票除了價錢更划算之外，更可能獲得套票專屬權益，例如獲升級親子主題房、兒童烘焙特色體驗和入住小贈品！

有興趣嘅朋友可以到 Klook 或 KKday 查看住宿餐飲套票餐，格下價先再決定。

【深圳硬石酒店】住宿餐飲套票體驗（Rock and Roll主題房）

心郁郁有興趣訂深圳硬石酒店嘅住宿套票，但係又唔知酒店環境如何？以下體驗分享就幫到你！

深圳硬石酒店以音樂為主題，由大堂掛滿嘅結他，到電梯入面嘅音頻跳動效果，每個細節都充滿Rock and Roll元素，令人眼前一亮。

如果時間充裕，絕對推薦住返晚，感受獨特嘅度假feel。

1. 房間設計及設施 (圓形浴缸、免費租借Fender結他)

酒店房間空間感十足，設計型格，而且充滿驚喜。

• 標誌性圓形浴缸： 浴室係全房嘅焦點，設有一個超大圓形浴缸，仲有個小梯級可以坐喺度。最正係旁邊嘅窗簾係電動嘅，可以一邊浸浴，一邊欣賞窗外景色。
• 音樂元素： 枕頭上有精緻嘅結他刺繡圖案，而且住客可以免費租借Fender電結他或黑膠唱片機到房內慢慢玩，音樂迷必愛！
• 貼心服務： 房間設備齊全，有齊USB及兩腳三腳插頭，仲有機會獲贈迎賓水果。

2. 景觀分析 (商場景 vs 高爾夫球場景)

房間主要分為兩種景觀，Check-in時可以睇下有無得揀。

• 商場景： 面向對面嘅觀瀾湖新城MH Mall，景觀非常開揚，夜晚城市燈光璀璨。
• 高爾夫球場景： 望向遠處嘅高爾夫球場及廠房建築，由於樓層夠高，視野無遮擋，綠意盎然，感覺較為寧靜。

3. 酒店親子設施及其他服務

深圳硬石酒店係一間非常出名嘅親子酒店，設施超多，帶住小朋友嚟放電絕對無問題！

• Rock City兒童俱樂部：位於酒店6樓，係小朋友嘅玩樂天堂，有波波池、夾公仔機、打鼓遊戲等，保證小朋友入到去唔願走。
  
• 親子烘焙班：部分住宿套票會包含「小小廚師烘焙活動」，家長可以帶小朋友一齊整蛋糕。記得要提早同酒店預約，活動時段通常係上晝10:30或下晝3:00。
  
• 24小時健身室：酒店嘅健身室同樣喺6樓，24小時開放，住客憑房卡即可進入。健身室空間比想像中大好多，器材應有盡有，甚至有教練駐場，非常專業。
  
• 頂樓露天泳池：位於酒店最高嘅26樓，設有露天泳池同空中花園。泳池唔算非常大，但長度足夠游水，景觀一流。提提大家，去游水記得要帶泳帽。

【深圳硬石酒店】周邊玩樂懶人包

住喺硬石酒店嘅一大好處，就係周邊配套極之完善，食買玩一應俱全，安排一個兩日一夜嘅行程話都無咁易！

1. 觀瀾湖新城 MH Mall (大型商場、超市、溜冰場)

酒店對面就係大型商場觀瀾湖新城 MH Mall，由地鐵站C出口可以直達。商場非常大，應有盡有：

• 食肆林立： 如果唔食酒店自助餐，商場有大量餐廳選擇（更多深圳美食推介）
• 購物娛樂： 有戲院、大型運動店「迪卡儂」、家居用品城，仲有Outlet，折扣非常吸引。
• 大型超市： B1層嘅「Patio Bar de O」超市，規模同貨品種類堪比盒馬，價錢親民，可以買手信。
• 溜冰場： 商場內竟然有真雪溜冰場，喺炎炎夏日係消暑好去處！

2. 觀瀾海洋世界

由酒店向右行，或由地鐵站A出口直行2分鐘就到。

雖然場館唔大，但可以超近距離觀賞鯊魚、魔鬼魚、水母等海洋生物，適合親子快閃遊（Klook 預訂優惠門票）

3. 按摩水療及KTV推介

想鬆一鬆？酒店旁邊就有KTV同高級水療中心「湯泉一號水療場」，玩完成日去按摩放鬆吓就最啱。

另外，酒店對面馬路晚上仲有個小型夜市，可以買啲小食返酒店做宵夜。

👉🏻 更多深圳按摩/水療/spa推介

總括嚟講，深圳硬石酒店自助餐無論喺價錢、食物質素定交通方便程度上，CP值都極高，絕對係港人北上快閃「食好西」嘅不二之選。

屋企有小朋友嘅話，更可以考慮超豐富嘅住宿+餐飲優惠，嚟個2日1夜玩到盡！

希望呢份超詳盡嘅攻略，可以幫你輕鬆規劃一個食得滿足、玩得盡興嘅深圳之旅！

＊以上內容僅供參考，自助餐的菜式、價錢及供應細節或會因季節、供應及酒店安排而有所調整，實際情況請以酒店官方網站及當日供應為準。