香港人放假北上消費，已成為近年熱潮！但深圳發展迅速，近年新事不斷，除了開幕不久的全新酒店及商場，亦有不少全新深圳打卡景點，令人花多眼亂。
想知道2026年有咩最新、最值得去的深圳打卡好去處？
今次深圳貓小編就為大家整合最新、最詳盡的深圳打卡好去處懶人包，分類推介超過40個必去景點。
無論是最新 IG 人氣打卡點、文青慢活之選、親子打卡活動，抑或情侶拍拖打卡聖地，都應有盡有！文末更附有獨家酒店及活動預訂優惠秘技，幫你慳得更多！
深圳打卡好去處：偽出國・異國風情主題景點
無假又想飛？嚟深圳呢啲充滿異國風情嘅深圳打卡好去處，就可以輕鬆影到「偽出國」嘅呃Like相！
由日系小清新到歐陸童話小鎮，一個週末就可以環遊世界，絕對係情侶拍拖或者閨蜜影相嘅首選。
深圳世界之窗
想喺深圳影靚相，世界之窗絕對係必到景點！
作為深圳經典地標之一，世界之窗一個大型縮微景區，園內按比例複製咗來自世界各地約130個著名景點，當中包括巴黎鐵塔、埃及金字塔等，俾你一日之內環遊世界。
除咗打卡影相，園內仲有機動遊戲同精彩嘅歌舞表演，啱晒一家大細、朋友情侶過嚟深圳一日遊！
- ✨ 打卡位：巴黎鐵塔、埃及金字塔
- 📍 地址：深圳市南山區華僑城深南大道9037號
- 🚇 交通：地鐵1號線/2號線「世界之窗站」J出口
- ⏰ 開放時間：09:00 – 21:30
- 💰 門票/預約：Klook 預訂優惠門票
官湖村 (深圳「小鎌倉」)
想影日系小清新嘅相，一定要嚟大鵬新區嘅官湖村！呢度被譽為「深圳小鎌倉」，因為村內有個十字路口，同日本鎌倉高校前駅嘅經典場景非常相似。
配上蔚藍嘅大海同色彩繽紛嘅民宿，隨手一拍都充滿日劇感。影完相仲可以去旁邊嘅沙灘散步，享受寧靜嘅下午。
- ✨ 打卡位：鎌倉同款十字路口、彩色民宿牆、海邊公路。
- 📍 地址：深圳市大鵬新區官湖
- 🚇 交通：於蓮塘口岸或羅湖體育館乘E11大巴到葵涌汽車站，轉B956巴士到官湖村口。
- ⏰ 開放時間：全天開放。
- 💰 門票/預約：免費入場。
荷蘭花卉小鎮 (荷蘭鬱金香花海)
唔使飛荷蘭，喺深圳都可以睇到超靚嘅鬱金香花海！
南山區嘅荷蘭花卉小鎮充滿歐陸風情，標誌性嘅大風車、五彩斑斕嘅花壇同歐式建築，令人彷彿置身童話世界。呢度除咗影相，仲有花卉展廳同咖啡廳，可以參加花藝DIY，係週末北上半日遊嘅好選擇。
- ✨ 打卡位：荷蘭大風車、季節性鬱金香花海、歐式建築。
- 📍 地址：深圳市南山區月亮灣大道3008號
- 🚇 交通：深圳地鐵12號線南頭古城站D出口，轉乘的士約10分鐘。
- ⏰ 開放時間：全天開放。
- 💰 門票/預約：免費入場。
文谷小鎮 & 歐洲印象小鎮 (童話歐洲小鎮)
深圳有唔少「偽歐洲」嘅打卡點，其中最出名嘅就係文谷小鎮同歐洲印象小鎮。
前者位於龍崗，五顏六色嘅屋仔設計被稱為「深圳童話世界」，優點係遊客較少，可以盡情影相；後者位於南山世界之窗旁，高度模仿歐洲嘅運河同橋樑，建築更加精緻。兩個都係免費入場，最啱鍾意影相嘅你。
- 文谷小鎮
- 📍 地址：深圳龍崗區文博路（文博宮後面）
- 🚇 交通：深圳地鐵5號線長龍站A出口。
- 歐洲印象小鎮
- 📍 地址：深圳市南山區深南大道9037-6號（世界之窗旁）
- 🚇 交通：深圳地鐵1/2號線世界之窗站。
海山公園 (西班牙高迪風建築)
位於鹽田區嘅海山公園，係一個充滿西班牙風情嘅公園。
公園中心嘅海山藝術塔，借鑒咗西班牙建築大師高迪嘅風格，外形好似海洋生物，用色鮮豔大膽，視覺衝擊力極強。喺呢度打卡，post上IG話自己去咗巴塞隆拿都有人信！
- ✨ 打卡位：高迪風格嘅海山藝術塔。
- 📍 地址：深圳市鹽田區深鹽路2100号
- 🚇 交通：深圳地鐵2/8號線海山站B出口。
- ⏰ 開放時間：全天開放。
- 💰 門票/預約：免費入場。
深圳打卡：型格建築與城市地標
深圳作為一個設計之都，擁有唔少充滿未來感同設計感嘅型格建築，每個都係獨一無二嘅深圳打卡好去處。
無論係震撼嘅摩天輪、超現實嘅書店，定係充滿工業風嘅隧道，都絕對可以為你嘅IG帶嚟全新嘅風格！
水土保持科技示範園 (奇幻蚯蚓洞)
一個由廢棄採石坑改造而成嘅生態園，裡面有個超得意嘅打卡地標——「蚯之丘」。呢個建築模擬一個被放大嘅蚯蚓洞，隱喻生物對水土嘅依賴。洞穴雖然唔大，但裏面有好多不規則嘅洞口，無論係由內向外、定係由外向內影，光影效果都非常特別，影出嚟嘅相充滿奇幻感。
- ✨ 打卡位：「蚯之丘」嘅不規則洞穴光影。
- 📍 地址：深圳市南山區沙河西路4148號
- 🚇 交通：深圳地鐵5號線西麗站E出口。
- ⏰ 開放時間：09:00-12:00；14:00-17:00。
- 💰 門票/預約：免費入場。
鍾書閣 (螺旋書架書店)
同樣位於歡樂港灣嘅鍾書閣，被譽為「中國最美書店」之一。
店內最吸睛嘅莫過於一條巨大嘅紅色螺旋書架，由門口貫穿成間書店，設計感同科技感十足！螺旋式嘅階梯書牆，令人感覺好似走進一個超現實嘅時光隧道，每一個角落都係絕佳嘅打卡位，文青必去！
- ✨ 打卡位：紅色螺旋書架、階梯式書牆。
- 📍 地址：深圳市寶安區歡樂港灣東岸L1-021
- 🚇 交通：深圳地鐵5號線臨海站B2出口。
- ⏰ 開放時間：10:00 – 22:00。
- 💰 門票/預約：免費入場。
福田體育公園 (X形柱子工業風隧道)福田體育公園 (X形柱子工業風隧道)
估唔到體育公園都可以係打卡熱點？福田體育公園嘅觀眾席底下，隱藏住一條充滿工業風嘅隧道。隧道內一排排巨型嘅X形柱子，加上冷峻嘅水泥牆身，營造出一種獨特嘅深邃感同未來感。喺呢度影相，輕易就可以拍出型格十足嘅工業風大片！
- ✨ 打卡位：工業風隧道、X形水泥柱子。
- 📍 地址：深圳市福田區福強路30號
- 🚇 交通：深圳地鐵7號線上沙站E出口。
- ⏰ 開放時間：全天開放。
- 💰 門票/預約：免費入場。
歡樂港灣「灣區之光」 (深圳最大摩天輪)
嚟到深圳，點可以唔去坐下呢個高達128米嘅「灣區之光」摩天輪？佢係深圳目前最高嘅摩天輪，擁有28個橢球形全透明太空艙，可以360度欣賞深圳灣嘅景色。
入夜後，摩天輪會亮起七彩霓虹燈，配合整個歡樂港灣嘅燈光，氣氛超級浪漫，絕對係情侶拍拖必到嘅打卡點！
- ✨ 打卡位：摩天輪夜景、全透明太空艙內景。
- 📍 地址：深圳市寶安區海旺社區寶興路8號歡樂港灣
- 🚇 交通：深圳地鐵5號線臨海站A出口。
- ⏰ 開放時間：平日 10:30-22:00；假日 10:30-22:30 (摩天輪營運時間或有不同)。
- 💰 門票/預約：公園免費入場，乘搭摩天輪需另外購票。（Klook 預訂優惠門票）
深圳龍崗萬達廣場 (不夜天階)
深圳最大嘅購物商場之一，以未來科技為主題。商場最大嘅打卡亮點係中庭一條長30米、直通6樓嘅「不夜天階」，係世界最高嘅商業室內扶手電梯！扶梯頂部仲有個懸浮巨型LED球體，搭電梯時好似穿越緊去外太空，科技感爆棚！
- ✨ 打卡位：30米長「不夜天階」、懸浮LED球體。
- 📍 地址：深圳市龍崗區龍翔大道7188號
- 🚇 交通：深圳地鐵10號線華南城站C出口。
- ⏰ 開放時間：商場 10:00-22:00，不夜天階至 02:00。
- 💰 門票/預約：免費入場。
深圳打卡景點 2026：最新 IG-able 人氣打卡點！
想快人一步去勻深圳最新嘅IG-able熱點？
近年深圳湧現唔少極具話題性嘅深圳打卡好去處，由充滿未來感嘅圖書館到新開幕嘅大型商場，每個都係呃Like必到之地。
快啲mark低以下幾個最新人氣打卡點，週末就約埋朋友一齊去發掘啦！
深圳圖書館北館 (太空電梯)
近期喺小紅書爆紅嘅深圳打卡好去處，絕對非深圳圖書館北館莫屬！
呢度以「科技」為主題，最震撼嘅打卡位就係高達18米、充滿科幻感嘅「太空電梯」地下書庫。鋼筋書架上放滿無數藍色箱仔，工業風十足，隨便影都好似置身科幻電影場景。
不過想朝聖就要留意，地下書庫參觀名額極之搶手，每日限定人數，記住要預早喺官方微信公眾號預約！
- ✨ 打卡位：18米高工業風「太空電梯」地下書庫。
- 📍 地址：深圳市龍華區中梅路與騰龍路交叉口
- 🚇 交通：深圳地鐵4號線、6號線紅山站A1出口，步行約200米。
- ⏰ 開放時間：星期二至日 09:00 – 21:00（星期一閉館）
- 💰 門票/預約：需要預約！ 喺「深圳圖書館」微信公眾號預約「書海探底」活動。
0AO藝術空間 (美國街頭景)
想唔使飛都影到美國街頭風嘅相？寶安區呢個「0AO藝術空間」就係你嘅目的地！呢度完美複製咗美國「拉斯維加斯」嘅絢麗霓虹燈同街頭場景，仲有復古老爺車同電話亭做道具，隨手一拍都好有公路電影feel。無論日頭定夜晚去影相，都各有特色，旅遊感十足！
- ✨ 打卡位：復古老爺車、霓虹燈街景、美式電話亭。
- 📍 地址：深圳市寶安區福洲大道智美滙志產業園B5棟一層
- 🚇 交通：深圳地鐵11號線福永站D出口，再轉乘的士。
- ⏰ 開放時間：09:00 – 19:30
- 💰 門票/預約：需要預約！ 喺「0AO藝術空間」微信公眾號預約參觀。
太子灣招商花園城 (新開幕商場)
2025年5月新開幕嘅太子灣招商花園城，係深圳第二座花園城，商業面積達11.5萬平方米，分為南北兩區。
呢個純白海濱街區式商場，行起上嚟非常有度假feel。商場進駐咗唔少多元化嘅特色商店，例如寵物體驗店「超級鳥局」、運動娛樂中心「引力矩陣」等，啱晒鍾意發掘新嘢嘅你。
- ✨ 打卡位：純白海濱街區建築、開揚海景。
- 📍 地址：深圳市南山區南海大道88號
- 🚇 交通：深圳地鐵2號線蛇口港站／12號線太子灣站。
- ⏰ 開放時間：一般為 10:00 – 22:00
- 💰 門票/預約：免費入場。
iN城市廣場 (翻新重開)
福田區嘅iN城市廣場完成翻新重開，搖身一變成為潮人集中地！
商場標榜擁有3萬平方米深圳最大嘅戶外廣場，設有籃球場、網球場，充滿活力。
場內進駐超過100個品牌，包括大型超市「永輝超市」、室內外滑板場、朗玩室內遊樂場等，食肆方面亦有八合里牛肉火鍋、四季椰林椰子雞等港人熟悉嘅餐廳，絕對係一個食玩買俱全嘅深圳好去處。
- ✨ 打卡位：大型戶外廣場、特色店舖門面。
- 📍 地址：深圳市福田區深南中路1095號
- 🚇 交通：深圳地鐵6號綫科學館站F出口，步行約5分鐘。
- ⏰ 開放時間：一般為 10:00 – 22:00
- 💰 門票/預約：免費入場。
深圳打卡好去處推介：文青最愛、古城藝術之旅
如果你鍾意漫步歷史建築，感受濃厚嘅藝術氣息，深圳絕對唔會令你失望。
由千年古城到充滿懷舊鐵道風情嘅火車站，呢啲深圳打卡好去處最適合文青們花上半日時間，影相慢活，發掘城市嘅另一面。
大芬油畫村 (中國油畫第一村)
濃厚嘅藝術氛圍，令大芬油畫村成為藝術愛好者嘅天堂，行喺街上隨時感覺自己「偶遇梵高」。
呢度由最初嘅油畫加工工場，發展成今日集畫廊、藝術家工作室同美術館於一身嘅藝術社區。
你唔單止可以睇到畫家即席揮毫，仲可以買到價錢實惠嘅油畫，甚至體驗油畫工作坊，一嘗做畫家嘅滋味。
- ✨ 打卡位：街頭塗鴉牆、大芬美術館、畫廊門口。
- 📍 地址：深圳市龍崗區布吉街道大芬村
- 🚇 交通：深圳地鐵3號線大芬站A1出口。
- ⏰ 開放時間：全天開放。
- 💰 門票/預約：免費入場。
觀瀾古墟 & 沙井古墟 (清末民初古墟)
想睇更原始嘅古蹟？可以去觀瀾古墟或沙井古墟。
前者係深圳保存最完整嘅古村落之一，保有傳統客家建築風格，夜晚更有燈光Show；後者係深圳現存面積最大嘅清末民初古墟，內有牌坊、古井同廢墟，文青味十足，其中南宋建成嘅龍津石塔更係必睇古蹟。
- 觀瀾古墟
- 📍 地址：深圳龍華區觀瀾園河路與布新路交叉口東南
- 🚇 交通：深圳地鐵4號線觀瀾站B出口。
- 沙井古墟
- 📍 地址：深圳市寶安區沙井大街343號
- 🚇 交通：深圳地鐵11號線橋頭站，轉乘的士。
清水河舊火車站 (懷舊鐵道風)
鐵道迷必去嘅免費打卡秘景！羅湖區清水河呢個廢棄嘅舊火車站，停泊咗幾截充滿懷舊復古風嘅綠皮火車頭同車廂。
生鏽嘅鐵軌、斑駁嘅車身，喺夕陽下影相特別有Feel，隨手一拍都係充滿電影感嘅文青大片。因為已經廢棄，可以放心喺路軌上盡情打卡。
- ✨ 打卡位：綠皮火車頭、長長嘅鐵軌、廢棄車廂。
- 📍 地址：深圳市羅湖區清水河一路（深圳進元大廈旁邊）
- 🚇 交通：深圳地鐵3號線草埔站D3出口。
- ⏰ 開放時間：全天開放。
- 💰 門票/預約：免費入場。
南頭古城 (歷史與潮流結合)
擁有近1700年歷史嘅南頭古城，經過活化保育後，完美地將古色古香嘅祠廟遺跡同典雅清新嘅小店結合。
喺呢度，你可以穿梭於歷史建築之間，轉個彎又會發現新潮嘅咖啡店、黑膠唱片工廠、小眾香氛店，新舊交融嘅衝擊感令呢度成為一個獨一無二嘅文青聚腳地，而且無需門票，可以隨意閒逛。
- ✨ 打卡位：古城牆、特色小店門面、新舊交融嘅街景。
- 📍 地址：深圳市南山區深南大道
- 🚇 交通：深圳地鐵12號線南頭古城站C出口。
- ⏰ 開放時間：全天開放。
- 💰 門票/預約：免費入場。
甘坑客家小鎮 (深圳小麗江)
被譽為「深圳版小麗江」嘅甘坑客家小鎮，係一個充滿客家風情嘅古色古香旅遊地。
小橋流水、古建築、紅燈籠，吸引咗唔少人專程著住漢服嚟打卡影相。鎮內有好多地道小食，亦有唔少手信舖，日頭同夜晚各有唔同風味，係體驗傳統文化嘅深圳打卡好去處。
- ✨ 打卡位：客家圍屋、小橋流水、燈籠街。
- 📍 地址：深圳市龍崗區布吉街道甘坑客家小鎮
- 🚇 交通：深圳地鐵10號線甘坑站B出口。
- ⏰ 開放時間：全天開放。
- 💰 門票/預約：免費入場。
深圳當代藝術與城市規劃館
深圳嘅博物館同藝術館都非常值得一去，而且好多都係免費入場！
位於福田區，建築本身就係一件藝術品！由大量傾斜、扭曲嘅曲面構成，充滿未來科技感，光影交錯下影相超靚。記得要提早預約！
- 🚇 交通：地鐵3/4號線少年宮站A2出口。
華強北博物館
主題圍繞「中國電子第一街」，展館設計充滿科技感，大量霓虹燈閃爍效果加埋鏡面牆壁，用廣角鏡影相視覺衝擊力極強。需要預約！
- 🚇 交通：地鐵2/7號線華強北站E2出口。
錢江藝術中心
一間私人藝術館，鵝黃色嘅中西合璧展館大樓好華麗，門口仲有古董老爺車，成個區都好啱影相，重點係免費免預約！
- 🚇 交通：地鐵14號線石芽嶺站J出口。
深圳打卡景點推薦：無敵海景・海濱公園及沙灘
想遠離城市煩囂，聽下海浪聲？
深圳東部擁有多個水清沙幼嘅海灘同風景優美嘅海濱公園，係睇日落、吹海風、打卡影靚相嘅絕佳深圳好去處。無論你想漫步海濱棧道，定係喺沙灘上hea返個下晝，總有一個海景點適合你。
鹽田海濱棧道 (19.5公里臨海棧道)
被譽為「世界最長海濱棧道」嘅鹽田海濱棧道，西起中英街，東至小梅沙，全長達19.5公里。
棧道沿住海岸線而建，沿途可以欣賞到無敵開闊嘅海景。你可以選擇其中一段輕鬆行，吹住海風，享受慢活時光。沿途嘅燈塔圖書館亦係一個必到嘅打卡點，可以安靜地睇書睇海。
- ✨ 打卡位：沿海木棧道、燈塔圖書館、無敵海景。
- 📍 地址：深圳市鹽田區（西起中英街古塔公園，東至小梅沙公園）
- 🚇 交通：深圳地鐵8號線海山站B出口或鹽田港西站。
- ⏰ 開放時間：全天開放。
- 💰 門票/預約：免費入場。
楊梅坑 (絕美玻璃水海灘)
位於大鵬半島嘅楊梅坑，擁有深圳數一數二嘅靚海景，海水清澈見底，被譽為「絕美玻璃水海灘」。
沿住海岸公路踩單車係呢度最經典嘅玩法，一路都係山海相連嘅壯闊風光。附近嘅鹿嘴山莊更係睇日落嘅好地方，夕陽染紅整片天空嘅景象，絕對令人畢生難忘。
- ✨ 打卡位：玻璃水海灘、沿海公路、鹿嘴山莊日落。
- 📍 地址：深圳市龍崗區南澳街道
- 🚇 交通：於市區乘E11大巴到南澳，再轉M274巴士到楊梅坑。
- 💰 門票/預約：免費入場。
深圳灣公園 (沉浸式睇海)
交通最方便嘅市區睇海點！由地鐵站一出就見到無敵大海景，成個公園沿住海岸線而建，全長13公里。
你可以喺度踩單車、野餐、或者單純喺海邊放空。黃昏時分，夕陽將整個海灣染成金色，畫面非常寫意，係拍攝日落剪影嘅絕佳地點。
- ✨ 打卡位：海邊長廊、日落景色、草地野餐。
- 📍 地址：深圳市福田區濱海大道
- 🚇 交通：深圳地鐵9號線深圳灣公園站D2出口。
- ⏰ 開放時間：06:00 – 23:00。
- 💰 門票/預約：免費入場。
南山前海石公園 (無邊際海景)
想搵個遊人較少嘅地方靜靜睇海？南山嘅前海石公園就係你嘅隱世之選。雖然公園唔算大，但海景非常驚艷，比深圳灣公園更寬廣。喺呢度可以欣賞到延伸至視野盡頭嘅跨海大橋，同對岸嘅城市高樓景色。夢幻嘅海上日落每日上演，感覺好似一人承包咗整片大海。
- ✨ 打卡位：無邊際海景、跨海大橋、海上日落。
- 📍 地址：深圳市南山區前海
- 🚇 交通：深圳地鐵5號線前灣站C出口，步行約1公里。
- ⏰ 開放時間：全天開放。
- 💰 門票/預約：免費入場。
玫瑰海岸 & 桔釣沙 & 西湧 (人氣沙灘)
深圳東部大鵬半島係優質沙灘嘅集中地，每個都有唔同特色：
- 玫瑰海岸：以浪漫為主題，有教堂、城堡等婚紗攝影場景，啱晒情侶打卡。
- 桔釣沙：被譽為「海上仙境」，沙質細軟，海水湛藍，係享受寧靜海邊時光嘅好地方。
- 西湧：深圳最長嘅海灘之一，有「東方夏威夷」之稱，更原始，遊客相對較少，適合衝浪同露營。
深圳打卡地方推介：城市綠洲・公園登山好去處
假日想親親大自然，呼吸新鮮空氣？
深圳有唔少大型公園同登山徑，無論你係行山新手定係資深山友，都可以搵到適合你嘅路線。以下精選幾個景色絕美嘅深圳公園同山峰，快啲約埋朋友去出一身汗，再打卡影靚相啦！
鐵仔山公園 (最美日落觀景台)
被網民譽為「深圳最美日落觀景台」嘅鐵仔山公園，絕對係攝影愛好者嘅天堂。
由山腳行大約30分鐘，就可以輕鬆登上山頂觀景台。喺呢度，你可以完美捕捉到夕陽晚霞、飛機升降剪影同波光粼粼嘅海面，三者交織成一幅超唯美嘅畫面。想影到最佳日落相，記住去「雲閣碧空」觀景點霸個靚位！
- ✨ 打卡位：日落晚霞、飛機升降剪影、城市全景。
- 📍 地址：深圳市寶安區西鄉街道廣深高速公路以西
- 🚇 交通：深圳地鐵1號線固戍站A出口，步行約20分鐘至山腳。
- ⏰ 開放時間：全天開放。
- 💰 門票/預約：免費入場。
梧桐山國家森林公園 (深圳第一峰)
想挑戰自己，征服深圳最高峰？嚟梧桐山就啱晒！主峰大梧桐海拔943.7米，被譽為「鵬城第一峰」。
上到山頂可以俯瞰整個深圳，天氣好時更可以遠眺香港。公園內有多條登山路線，難度不一，行山新手可以選擇較平緩嘅「梧桐山北路」，想快啲攻頂就可以行景色秀麗嘅「秀桐道」。
- ✨ 打卡位：山頂「鵬城第一峰」石碑、俯瞰深圳全景、雲海。
- 📍 地址：深圳市羅湖區蓮塘街道羅沙路2076號
- 🚇 交通(秀桐道)：深圳地鐵8號線深外高中站，轉乘巴士至「半山半海公交總站」。
- ⏰ 開放時間：06:00 – 19:00。
- 💰 門票/預約：免費入場。
香蜜公園 (空中棧道漫步)
位於福田市中心嘅一片城市綠洲，最出名嘅就係佢嘅空中棧道。
你可以沿住鋼結構嘅空中步道喺樹林之間輕鬆漫步，用唔同角度欣賞公園景色。園內仲有大片草地、玫瑰園同兒童遊樂場，無論係情侶拍拖定係親子活動都非常適合。
- ✨ 打卡位：鋼結構紅色空中棧道、玫瑰園。
- 📍 地址：深圳市福田區農園路30號
- 🚇 交通：深圳地鐵7號線農林站C出口。
- ⏰ 開放時間：全天開放。
- 💰 門票/預約：免費入場。
蓮花山公園 (俯瞰福田市景)
另一個位於福田區嘅大型公園，交通非常方便。公園內有大片草地，好多人會喺度放風箏同野餐。
沿住平緩嘅山路行上山頂廣場，就可以將福田CBD嘅摩天大樓景色盡收眼底，係欣賞城市天際線嘅絕佳位置。山頂廣場上嘅鄧小平銅像亦係公園嘅標誌。
- ✨ 打卡位：山頂廣場城市景觀、風箏廣場。
- 📍 地址：深圳市福田區紅荔路6030號
- 🚇 交通：深圳地鐵3/4號線少年宮站，或2號線蓮花西站。
- ⏰ 開放時間：06:00 – 23:00。
- 💰 門票/預約：免費入場。
延伸閱讀：
深圳酒店住宿推介
如果想喺深圳玩兩日一夜或者玩得盡興啲，揀間舒服又方便嘅酒店就非常重要！
無論你鍾意近口岸、近商場嘅方便之選，定係想遠離煩囂嘅海景度假酒店，深圳都有大量選擇。以下為你分區推介幾間CP值高、口碑好嘅深圳酒店。
深圳福田中心智選假日酒店 (Holiday Inn Express)
位於福田CBD核心地帶，鄰近福田及皇崗口岸，交通方便。酒店部分房間可以望到深圳高爾夫球場嘅開揚綠色景觀。房間採用乾濕分離設計，仲有機械人送貨服務，性價比高，適合商務或短途旅客。
深圳南山科技園澳特科興亞朵S酒店 (Atour S Hotel)
2023年新開業嘅酒店，位於南山科技園區，鄰近萬象天地商場同世界之窗、歡樂谷等景點。
酒店設計優雅舒適，房間有落地玻璃窗欣賞城景。設施非常多元化，除咗健身室，仲提供免費自助洗衣同24小時閱讀空間酒吧，服務貼心。
大梅沙京基洲際度假酒店 (Intercontinental Shenzhen Dameisha Resort)
想享受陽光與海灘，呢間絕對係首選！酒店面朝南海，三面環山，行出酒店就係大梅沙嘅金色沙灘。
大部分客房都坐擁迷人海景或園景，仲設有露台同浴缸。酒店最誇張係有6個室內外泳池，包括一個超靚嘅無邊際泳池，度假感滿分，啱晒親子家庭或者情侶過一個悠閒假期。
深圳打卡好去處常見問題 (FAQ)
Q1: 哪些熱門的深圳打卡景點是免費入場？
深圳有好多高質素嘅免費景點，絕對可以讓你玩得盡興又慳荷包！熱門免費深圳打卡好去處包括：
- 文青歷史類：南頭古城、甘坑客家小鎮、大芬油畫村、清水河舊火車站。
- 自然風光類：荷蘭花卉小鎮、鹽田海濱棧道、深圳灣公園、鐵仔山公園、梧桐山公園。
- 藝術建築類：錢江藝術中心、福田體育公園、海山公園。
Q2: 哪些深圳景點需要提前預約？
為咗更好嘅參觀體驗同控制人流，部分人氣極高嘅景點需要喺官方渠道提前預約。出發前記得check清楚，費事摸門釘！需要預約嘅景點主要有：
- 深圳圖書館北館：參觀「太空電梯」地下書庫必須喺「深圳圖書館」微信公眾號預約「書海探底」活動，名額非常緊張。
- 深圳當代藝術與城市規劃館：需喺官方微信公眾號預約入場。
- 華強北博物館：可以透過官網或微信公眾號預約。
- 0AO藝術空間：需喺「0AO藝術空間」微信公眾號預約參觀。
- 深圳天文台：進入天文館同部分區域需喺官方公眾號預約。
Q3: 如何前往深圳各主要景點？
深圳嘅公共交通網絡非常發達，尤其係地鐵，覆蓋大部分市區熱門景點，對香港遊客嚟講係最方便快捷嘅選擇。
- 地鐵：本文介紹嘅大部分景點，例如南頭古城、甘坑客家小鎮、歡樂港灣、福田CoCo Park等，都可以搭乘深圳地鐵直達或喺附近車站落車（按此閱讀深圳地鐵攻略！）建議喺規劃行程時，留意每個景點介紹下方嘅「🚇 交通」資訊，記低相應嘅地鐵線路同出口。
- 巴士/的士：對於一啲較偏遠嘅景點，例如大鵬半島嘅官湖村、楊梅坑等，可能需要由地鐵站轉乘巴士或的士。你可以使用內地嘅地圖App（如高德地圖、百度地圖）查詢最準確嘅巴士路線同車程時間。
睇完呢篇超詳細的深圳打卡好去處懶人包，係咪已經知道點玩法，急不及待想即刻出發呢？
無論你想去最古城影相打卡、去玩偽歐洲遊，抑或體驗文青藝術氣息，跟住深圳貓嘅指南就一定無介紹錯！
快啲約埋朋友、伴侶或者家人，計劃你嘅下一個深圳打卡精彩之旅啦！
深圳貓編 Sally，來自香港嘅90後女生，在家係貓奴，在外係社畜。放假鍾意周圍去，發掘唔同嘅地方。自從疫情通關後已北上深圳超過100次，鍾意深圳夠近夠方便、又平又好多嘢食！週末假期會去深圳行街、按摩、食嘢，整理成旅遊攻略分享。希望大家以後去深圳，都會嚟搵深圳貓，記得貓咪伴你行！
發表留言