週末想快閃深圳，歎返餐高CP值的五星級酒店自助餐？
位於福田嘅深圳溫德姆至尊酒店（又稱Wundermall酒店）絕對係唔少港人嘅深圳自助餐心水之選。
由福田口岸出發，搭兩個地鐵站就到，一出站口就係酒店，夠晒方便！
今次深圳貓就為大家全方位實測，深圳溫德姆至尊酒店自助餐有咩食、住宿體驗好唔好。
仲幫你整合出自助餐推薦菜式、價錢收費、餐廳地址、酒店配套等超詳盡攻略，即睇內文了解有幾抵玩！
【深圳貓 x Klook 獨家優惠碼】經本網站指定鏈結，於 Klook 中國內地活動滿 HK$100 並輸入優惠碼【NTSY25CN】，即享94折優惠！快啲 save 低呢個優惠碼，下次去深圳用啦！
【深圳溫德姆至尊酒店】自助餐價錢、賣點、交通懶人包
深圳溫德姆至尊酒店自助餐位於酒店三樓，環境寬敞，食物分區清晰。
由海鮮、鐵板燒到中西熱食、甜品，食物款式多到令人眼花繚亂，包你食到捧住個肚走！
1. 即撈活海鮮火鍋區 | 回本首選
深圳溫德姆至尊酒店自助餐嘅回本位絕對係即撈活海鮮！
每張枱都有個小火鍋，可以自己去海鮮區撈最新鮮嘅食材。基圍蝦非常生猛，仲識跳，煮熟後蝦肉爽彈鮮甜。
另外仲有沙白、紅貝、青口、鮑魚、海螺等六款貝殼類任君選擇，全部放入火鍋煮，鮮味十足！
旁邊仲有肥牛、羊肉片同大量蔬菜菇菌、丸類，打邊爐嘅配料一樣咁齊全。
2. 冰鎮海鮮區（大頭蝦、瀨尿蝦、青口）
除咗活海鮮，凍海鮮陣容亦唔輸蝕！
有成十款選擇，包括大頭蝦、凍蝦、瀨尿蝦、扇貝、青口，同埋好幾款螺同貝類，海鮮迷可以慢慢歎。
3. 烤肉鐵板燒區（即煎牛扒羊架、蒜蓉焗蠔）
肉食獸最愛嘅區域！師傅會喺鐵板區即叫即煎，包括牛扒、羊架、雞扒、煎魚等，鑊氣十足。 羊架醃得入味，肉質軟腍；牛扒亦煎得好靚，肉味濃郁。
旁邊嘅蒜蓉焗蠔更加係必搶項目，「聞到都好香」，蠔身飽滿 creamy，非常惹味！
4. 日式料理區（三文魚、吞拿魚魚生、壽司）
自助餐唔少得嘅日式料理。魚生有三文魚、吞拿魚、鯛魚、希靈魚等四款，厚切新鮮。
另外仲有素鮑魚、八爪魚前菜同多款壽司卷物，質素都OK。
5. 中式熟食區（佛跳牆、燉湯、熱炒）
中式熱食區充滿驚喜！竟然有佛跳牆供應，裏面用料十足，味道唔錯。
燉湯亦係誠意之作，例如花旗參烏雞湯，夠晒火喉，非常濃郁。其他熱炒選擇極多，例如避風塘炒海鮮、炭燒豬頸肉、龍蝦小炒肉、炆豬手、豉油雞等，款款都好吸引。
6. 粉麵及生滾粥檔
想食啲暖胃嘅嘢？可以去粉麵檔自選配料，整返碗雲吞麵或潮州河粉。
最正嘅係有即叫即滾嘅生滾粥！配料非常豐富，有齊蟹、蝦、雞肉、豬膶、皮蛋、魚片等，自己揀好料俾師傅煮，粥底綿滑，加上新鮮材料，啖啖都係鮮味，熱辣辣食落肚超舒服！
7. 甜品區（芝士焗榴槤、朱古力噴泉、多款蛋糕）
甜品係另一個胃嘅時間！焦點絕對係每枱獲贈嘅「芝士焗榴槤」，香氣逼人，口感軟滑。
另外仲有小朋友最愛嘅士多啤梨朱古力噴泉、多達六款口味嘅紐西蘭雪糕、芒果布甸、泡芙、啫喱、手工冰粉，同埋十幾款精緻蛋糕，甜品控一定會失心瘋！
8. 飲品區（紅白酒、啤酒、雞尾酒任飲）
呢度嘅飲品選擇多到誇張，絕對係一大賣點！除咗汽水、果汁、咖啡機之外，最吸引嘅係有紅白酒、青島啤酒、雞尾酒（有酒精及無酒精）全部任飲！
另外仲可以自己沖泡茉莉花茶、鐵觀音、普洱等多款茶葉，想飲咩都有！
【回本攻略】任撈海鮮、即開生蠔、芝士焗榴槤
深圳溫德姆至尊酒店自助餐最大嘅賣點，絕對係回本話咁易嘅丰富美食，以下幾樣必食推介，錯過咗就真係走寶！
- 任撈活海鮮：有別於一般嘅冰鎮海鮮，呢度特設即撈海鮮區，基圍蝦仲非常生猛，加上多款貝殼類同螺，即撈即煮，鮮味滿分！
- 即開生蠔＋蒜蓉焗蠔：生蠔控福音！除咗有新鮮即開生蠔，仲有超惹味嘅蒜蓉焗蠔，蠔身飽滿，蠔味香濃，每次一出爐都勁快俾人掃晒。
- 芝士焗榴槤：榴槤迷必食！餐廳會定時推出熱辣辣嘅芝士焗榴槤，由侍應逐枱派發。一出爐成個場都聞到勁香，榴槤蓉creamy香甜，加埋面頭焗到脆脆地嘅芝士，網民形容真係「好食到癲」！
【深圳溫德姆至尊酒店自助餐】自助早餐有咩食？
除咗享用自助晚餐之外，亦有唔少人會選擇到深圳2日1夜，瞓返一晚先走。
住得五星酒店，第二日嘅自助早餐當然唔可以錯過。
早餐同樣喺三樓餐廳享用，食物款式一啲都唔馬虎，非常豐富，保證你食飽飽先 Check out！
1. 早餐必食推介：即煮足料生滾粥
深圳溫德姆至尊酒店自助早餐嘅最大亮點，莫過於同晚餐一樣有供應嘅生滾粥！
喺香港酒店早餐比較少見，而且呢度嘅配料超足，有牛肉、雞肉、魚片、豬膶、豬心、皮蛋等任你揀，自選好料後由師傅即場生滾。
一碗熱辣辣、材料新鮮又豐富嘅靚粥，真係超好食，非常抵食！
2. 中式點心及熱食（腸粉、燒賣、豬紅、炒麵）
中式選擇非常多，有即蒸腸粉（蛋腸、牛肉腸）、蝦餃、燒賣、糯米雞等點心。
熱食方面，有豬紅、蘿蔔牛腩、炒麵、炒菜、金錢肚，甚至有油炸鬼送粥，充滿廣式風味。
3. 西式早餐選擇（奄列、煙肉、早餐腸、麵包）
西式早餐嘅基本盤都做得好好。有即叫即整嘅奄列（Omelette），材料自選。
另外仲有煙肉、三款早餐腸（牛、雞、豬）、茄汁焗豆、多款麵包、牛角包、Cupcake 同葡撻等，仲可以自己烘多士，牛油果醬都係獨立包裝，乾淨衛生。
4. 飲品及乳酪區
飲品選擇同樣周到，除咗自助咖啡機同果汁，最驚喜係竟然有港式奶茶！
另外仲有多款口味嘅乳酪（Yogurt）、凍牛奶、豆漿同芝士火腿，早餐粟米片都有成六款，滿足唔同人嘅口味。
【深圳溫德姆至尊酒店自助餐】價錢收費、餐廳資訊及預訂優惠
嚟到深圳溫德姆至尊酒店，最平人均 $1XX 就可以任食多款海鮮及多國菜式。
於 KKday 預訂更不時推出「週末不加價」優惠，星期一至日全部同價！以酒店自助餐嚟講，呢個價錢絕對係超抵。
以下是深圳溫德姆至尊酒店自助餐價錢收費、餐廳資訊及預訂優惠，供大家參考。
【深圳溫德姆至尊酒店自助餐】價錢收費（自助午餐及晚餐）
| 午餐/晚餐 | 平日 | 週末及假期 |
|---|---|---|
| 自助午餐 | $199/位 | $222/位 |
| 自助晚餐 | $246/位 | $270/位 |
*自助餐價格不時變動，以上資料僅供參考，最新價錢請以預訂平台為準。
【深圳溫德姆至尊酒店自助餐】餐廳基本資訊
- 餐廳名稱：趣味自助餐廳
- 地址：深圳市福田區彩田路2009號瀚森大廈 深圳溫德姆至尊酒店 3樓
- 前往方法：由福田口岸過關後，乘搭深圳地鐵10號線，只需2個站即可到達江夏站。從D出口一出，抬頭就見到酒店，步行不需1分鐘。
- 自助餐供應時段：
- 自助早餐：6:30 – 10:00
- 自助午餐：12:00 – 14:30
- 自助晚餐：18:00 – 21:00
預訂方法及平台優惠（Klook、KKday）
想以最抵價錢享受深圳溫德姆至尊酒店自助餐同住宿，強烈建議留意旅遊平台嘅優惠。
例如 Klook 就曾經推出半價（等當於買一送一優惠），KKday 亦不時有「週末不加價」優惠，錯過優惠真係走寶！
酒店Staycation套票介紹
如果想玩得更盡興，強烈推薦預訂深圳溫德姆至尊酒店嘅Staycation套票。
人均 $700 起就可以歎到五星級住宿（2日1夜）、自助午/晚餐、同埋第二日嘅豐富自助早餐，CP值極高！房間空間闊落，設計有氣派，絕對係一個舒適嘅度假體驗。
仲可以任用健身室同恆溫泳池，咁嘅價錢喺香港真係無乜可能搵到！
1. 房型比較：雙人房 vs 大床房 Room Tour
套票通常可以揀雙床房或大床房，價錢一樣，但格局略有不同。兩個房型面積都約40至45平方米，空間感十足。
- 雙人房：設有兩張1.35米闊嘅床，適合朋友或家庭入住。窗邊有梳化和書桌，電視可以收到香港電視台，非常貼心。
- 大床房：格局更有特色，一入門有個玄關位。房間配備一張足足2米闊嘅超級大床，瞓得超舒服！窗邊除咗書桌，仲有一張貴妃椅梳化，可以喺度hea。最特別係浴室旁邊有個獨立衣帽間，入面仲有張梳妝枱，方便女士化妝。
2. 浴室設施：乾濕分離與大浴缸
五星酒店嘅浴室絕對唔會令人失望。房間浴室採用乾濕分離設計，淋浴間配備雨林式花灑。
最正嘅係每個房型都有一個超大浴缸，最啱鍾意浸浴嘅朋友放鬆一下。
大床房嘅浴室更有落地玻璃窗，可以邊浸浴邊欣賞城景，私隱度方面唔使擔心，有電動窗簾一按即可關上。
3. 酒店康樂設施：高空健身室及恆溫泳池
酒店嘅康樂設施位於31樓高層，景觀非常開揚。住客可以憑房卡免費使用。
- 健身室：空間頗大，健身器材都沿住落地玻璃窗邊擺放，種類齊全。可以一邊做運動，一邊俯瞰城市景色，令人心曠神怡。
- 室內恆溫泳池：泳池長度足夠，而且全年開放，無論咩天氣都可以暢泳，係度假放鬆嘅好去處。
【深圳溫德姆至尊酒店】配套及周邊資訊
深圳溫德姆至尊酒店除咗自助餐出色，酒店本身同周邊配套都非常完善，方便住客食買玩。
1. 酒店其他餐廳（法國餐廳、鐵板燒）
除咗三樓嘅自助餐，酒店內仲有其他餐飲選擇。
位於3樓嘅鐵板燒餐廳「瀧悅鐵板燒料理」，裝潢大體，適合慶祝特別日子。另外亦有中式酒樓，為住客提供多元化嘅美食體驗。
2. 鄰近商場及景點（華強北、卓越中心）
酒店地理位置優越，鄰近多個購物熱點。食完早餐可以去「電子一條街」華強北逛逛，睇下最新嘅電子產品，港人買手機家電仲有折扣。
另外，酒店距離卓越中心（One Avenue）亦非常近，嗰度係大型綜合商場，有大量商店同餐廳，行街食飯都好方便。
【深圳溫德姆至尊酒店】自助餐及住宿常見問題
首次到訪深圳溫德姆至尊酒店的旅客，通常都會有不少疑問。
深圳貓為大家整合了深圳溫德姆至尊酒店自助餐及住宿的常見問題和答案，讓大家在出發前先了解更多資訊！
Q. 如何從香港前往最方便？
最方便嘅路線係經福田口岸/落馬洲支線過關，然後轉乘深圳地鐵10號線，往「雙擁街」方向坐2個站到「江夏站」，從D出口一出就係酒店，全程非常快捷。
Q. 自助餐需要提前預約嗎？
強烈建議提前預約，尤其係週末同公眾假期。
如果係經 Klook、KKday 等平台購買Staycation套票，通常已包含自助餐，但如果係單獨購買自助餐券，最好先致電酒店確認位置。
Q. 週末及假日的收費是多少？
週末及假日的自助餐收費會比平日稍高，參考價錢約為 $233 起一位。不過實際價格可能因推廣活動而異，建議以預訂平台顯示嘅價錢為準。
Q. 住宿套票通常包括什麼？
深圳溫德姆至尊酒店嘅 Staycation 套票CP值非常高，通常包括：一晚酒店客房住宿、雙人自助午/晚餐、雙人自助早餐，以及免費使用酒店嘅健身室和室內恆溫泳池。
呢個組合絕對係一個完美嘅週末快閃度假之選。
總括而言，深圳溫德姆至尊酒店無論在地理位置、自助餐質素，還是Staycation套票的性價比方面，表現都相當出色。
特別是晚市自助餐的即撈活海鮮、即開生蠔及早餐的足料生滾粥，都令人印象深刻。
如果你正計劃一個食住都高質的深圳週末快閃之旅，這裡絕對是個不會讓你失望的選擇！
＊以上內容僅供參考，自助餐的菜式、價錢及供應細節或會因季節、供應及酒店安排而有所調整，實際情況請以酒店官方網站及當日供應為準。
深圳貓編 Sally，來自香港嘅90後女生，在家係貓奴，在外係社畜。放假鍾意周圍去，發掘唔同嘅地方。自從疫情通關後已北上深圳超過100次，鍾意深圳夠近夠方便、又平又好多嘢食！週末假期會去深圳行街、按摩、食嘢，整理成旅遊攻略分享。希望大家以後去深圳，都會嚟搵深圳貓，記得貓咪伴你行！
發表留言