週末快閃深圳，福田區因交通方便、商場林立，成為港人北上住宿的熱門之選。但面對林林總總的深圳福田酒店，從新開張到五星級，究竟點揀好？
今次小編就為你整合超詳盡的「福田酒店推介」懶人包，精選超過20間人氣酒店，按新開幕、奢華級、親子家庭、高CP值及打卡設計等主題分門別類無論你的預算或行程需要如何，都能快速鎖定心水住宿！
文末更附有福田交通及玩樂懶人包，助你輕鬆規劃行程！
為何選擇福田酒店？交通、玩樂核心區優勢
福田作為深圳市的中心商務區，對港人旅客而言有幾大優勢：
- 過關超方便：鄰近福田及皇崗兩大口岸，不少酒店距離口岸僅5-10分鐘車程，方便快捷。
- 商場林立：區內坐擁星河COCO Park、One Avenue卓悅中心、皇庭廣場、深業上城等大型購物熱點，行街食飯一應俱全。
- 交通網絡成熟：多條地鐵線路貫穿，無論去深圳其他區玩，或乘搭高鐵都非常便利。
- 選擇多元化：由人均唔使$200的平價酒店，到奢華級的國際品牌酒店，豐儉由人，迎合不同預算和需求。
【福田酒店推介】近年新開幕新酒店
鍾意試新嘢嘅你，點可以錯過以下幾間近年新開嘅福田酒店？
設施夠新淨，服務體驗有驚喜，絕對係週末快閃嘅優質之選！
深圳福田皇崗城際酒店 (地鐵出口直達/德國品牌)
呢間酒店嘅方便程度係無敵！2023年4月新開，屬於德國品牌旗下，質素有保證。
最大賣點係地鐵7號線皇崗村站一出就到，完全唔使日曬雨淋。酒店行德式簡約風，房間闊落隔音好，而且超有誠意，唔單止房內飲品免費，仲有免費宵夜券送！
唔少住客都讚生日入住會獲酒店細心佈置，服務貼心，性價比極高！
深圳福田華強北希爾頓歡朋酒店 (近華強北商圈)
如果你嘅行程主要係去華強北電子市場，咁呢間2023年新開嘅希爾頓歡朋就最適合。
酒店距離燕南站只有2分鐘步程，附近有齊茂業天地、KKMALL等商場，地理位置優越。房間採用全落地窗設計，空間感十足，可以欣賞到高空城景，無論情侶定家庭入住都好啱。
深圳福田中洲灣城際酒店 (鄰近teamLab/蔦屋書店)
文青打卡必住！呢間2023年開幕嘅酒店係德國IntercityHotel品牌喺中國嘅首間旗艦店，設計時尚前衛。
酒店旁邊就係中洲灣C Future City同KKONE兩大商場，teamLab同蔦屋書店就喺樓下，商業配套極之完善。酒店評價普遍話服務到位，有五星級酒店嘅水準，性價比超高。
建國璞隱酒店 (新中式國風/免費租漢服)
想體驗唔一樣嘅住宿，可以試下呢間2024年開幕嘅全新國風酒店。
酒店設計雅致有品味，充滿原木、竹編、水墨畫等新中式元素，房間更以古詩命名！最特別係住客可以免費租借漢服，到頂樓嘅空中花園茶室打卡，完全沉浸喺禪意之中，好有Feel！
米漾酒店（福田會展中心崗廈地鐵站店）
同樣係2024年新開嘅酒店，最大賣點係交通極方便。距離崗廈站只有2分鐘步程，去福田高鐵站、福田口岸都只係10分鐘車程。
酒店以自然為主題，色調柔和，營造出放鬆嘅氛圍。網民大讚房間闊落乾淨，服務好，位置超方便，Trip.com評分高達9.5分！
【福田酒店推薦】奢華五星級酒店
想好好獎勵自己，享受一趟奢華之旅？
福田區雲集多間國際頂級品牌酒店，無論係高空景觀、頂級餐飲定係尊貴服務，都能滿足你對奢華嘅所有想像。
深圳文華東方酒店 (深業上城/高層景觀)
文華東方品牌嘅保證，質素毋庸置疑。酒店於2022年開幕，位於深業上城大樓高層，最大賣點就係佢嘅開揚景觀，部分房間設有落地大玻璃，可以遠眺深圳灣同城市天際線。
酒店設有8間餐廳酒吧同高層水療中心，奢華至極。網民普遍讚服務周到細心，慶祝紀念日入住更有驚喜佈置，體驗滿分。
深圳柏悦酒店 (CBD中心/俯瞰商圈)
柏悦酒店位於福田CBD核心地帶，樓下就係大型購物中心，食買玩極方便。
酒店位於大樓高層（36-44樓），景觀一流，可以俯瞰整個深圳繁華商圈，部分房間更可遠眺深圳灣。酒店設施齊全，恆溫泳池、SPA等一應俱全，更被Trip.com評為深圳美食酒店第1名，對餐飲有要求嘅你絕對唔可以錯過。
深圳四季酒店 (鄰近三大購物中心)
四季酒店同樣位於福田商務中心，距離福田口岸僅10分鐘車程，而且鄰近三間大型購物中心，地理位置極佳。
酒店房間配備景觀浴缸，可以喺房內享受浸浴樂趣。設施方面亦非常全面，包括室內外泳池、桑拿、按摩浴缸等，讓你盡情放鬆身心。
【福田酒店推介】親子家庭/兒童篇
帶住小朋友出遊，揀一間適合一家大細嘅福田酒店就最緊要！
無論係想搵有廚房嘅公寓，定係有兒童主題房、波波池嘅酒店，福田都有唔少好選擇。
金茂深圳JW萬豪酒店 (新裝修/特色行政房)
JW萬豪酒店位於福田商業區中心，鄰近車公廟地鐵站，交通四通八達。
酒店經過重新裝修，房間風格現代簡約，空間感十足。最大特色係全新推出嘅「經典行政客房」，可以根據住客需要延伸出唔同主題，例如禪茶、親子遊戲或者瑜伽空間，提供更個人化嘅體驗。住客普遍讚賞酒店職員服務優秀，床品舒適。
深圳葵花酒店公寓 (複式套房/帶廚房)
如果想有「家」嘅感覺，呢間酒店公寓就最適合。主打複式套房，房型選擇超多，由單人房到兩房一廳都有，部分更有閣樓或露台，空間感十足！房内有齊廚房同洗衣機，方便照顧小朋友嘅飲食同日常需要。
酒店位置亦唔錯，可以步行到星河COCO Park，夠晒方便。
深圳憬居酒店 (親子主題/兒童探索館)
帶小朋友放電必住！呢間2023年新開嘅親子主題酒店，本身座落於「婦兒大廈」內，成棟建築色彩繽紛。
酒店特設9款兒童主題房，例如「森林小屋」房內有齊攀爬網同波波池，小朋友見到一定超興奮！酒店樓下更有兒童探索館同圖書博物館，玩足一日都無問題！
深圳福田口岸希爾頓歡朋酒店 (近口岸/親子房)
如果你經常經福田口岸過關，呢間2023年新開嘅希爾頓歡朋絕對係首選！
由福田口岸行過去只需5分鐘，對面就係大型水療中心，地理位置超優越。
酒店提供親子房型，房內有聲控智能家居同機械人送外賣服務，科技感十足。住客普遍讚前台職員有禮，房間衛生乾淨，體驗唔錯。
【打卡設計感】福田酒店推介
對於追求住宿美學嘅你，酒店唔單止係瞓覺嘅地方，更加係旅程中嘅一道風景。以下幾間設計感十足嘅福田酒店，無論係文青風定係奢華打卡風，都絕對能夠滿足你嘅相機！
深圳無印良品酒店 (全球首間MUJI Hotel)
MUJI迷必住！全球第一間無印良品酒店就喺深圳福田深業上城，集酒店、餐廳同旗艦店於一身。
成間酒店貫徹無印簡約、環保、實用嘅理念，由內到外都係滿滿嘅MUJI Style。酒店大堂牆面用咗廢棄船木，房內配備CD機、香薰機同無印自家產品，處處都係細節。喺度住一晚，絕對係一種獨特嘅生活體驗。
深圳濱河時代ICON LAB艾墾酒店 (圓形景觀浴缸)
呢間酒店絕對係情侶打卡首選！酒店房間有超大落地玻璃窗，而最大賣點就係部分房型配備面向城景嘅「圓形景觀浴缸」，夜晚可以一邊浸浴，一邊欣賞深圳灣日落或城市夜景，畫面超級IG-able！
酒店設計時尚簡約，而且隔音唔錯，可以享受二人世界。
LIA力亞酒店（深圳會展中心店）(復古工業風/房內巨幕投影)
呢間小型設計酒店行復古工業風，大堂用上金屬同暗紅磁磚，影相打卡非常有格調。
酒店主打「宅度假」體驗，每間房都標配巨型屏幕同投影機，可以喺床上面「躺平」睇戲，超級Chill！雖然房數唔多，但設計溫馨，而且地點方便，行10分鐘就到福民站同各大商場。
薈語酒店（深圳福田口岸會展中心店）(城市綠洲設計/打卡大堂)
想喺繁華鬧市中搵一片綠洲？薈語酒店就係咁嘅存在。
酒店大堂採用大量落地玻璃同綠色植物，設計清新自然，令人心情放鬆。酒店位於COCO Park旁邊，行5分鐘就到石厦地鐵站，地點極佳。網民普遍讚酒店環境清靜、光線充足，職員服務細心，係一個令人想再次入住嘅舒適空間。
【福田酒店】高CP值平價推介
去深圳玩想將錢主要用喺食買玩？無問題！
福田區有好多CP值極高嘅平價酒店，人均$200左右已經有交易，乾淨企理之餘，部分仲有驚喜設施，絕對係慳錢精明之選。
深圳福田香蜜湖亞朵酒店 (近山姆超市)
如果你嘅行程重點係要去山姆超市(Sam’s Club)掃貨，咁呢間亞朵酒店就係你嘅最佳落腳點！
酒店行去山姆福田店非常近，買完一大堆戰利品可以直接拎返酒店，勁方便。酒店2022年開業，設施夠新，房間闊落舒服，仲有機械人送外賣，服務貼心。唔少住客都讚酒店氣氛舒適，環境整潔。
秋果S酒店（深圳會展中心聯合廣場店）(房內3D電視/投影儀)
人均二百蚊有找，房內竟然有投影儀甚至3D電視？秋果S酒店就係咁有驚喜！
酒店位於福田金融中心，鄰近福田口岸，生活機能極佳。最大特色係部分房間提供投影儀，可以喺床上面舒服睇戲，係平價酒店中非常罕見嘅享受，CP值超高！
桔子酒店（深圳福田會展中心店）(智能家居)
桔子酒店係另一個CP值高嘅連鎖品牌。呢間分店2022年開業，位於福田核心商業區，毗鄰口岸同高鐵站，周邊配套完善。
酒店房間乾淨企理，而且使用智能家居遙控，非常方便。住客普遍讚職員態度友善，食物選擇亦多。
全季酒店（深圳會展中心崗廈地鐵站店）(連鎖品牌/簡約乾淨)
想搵間穩陣、乾淨企理嘅平價酒店，連鎖品牌全季酒店係唔錯嘅選擇。
2021年開業，木系色調裝修簡約舒適。酒店位置方便，距離崗廈地鐵站約5分鐘路程，鄰近卓悅中心，食嘢行街都好方便。網民讚酒店設備齊全，職員態度友善，係可靠嘅平價之選。
福田酒店預訂前必看FAQ
快速解答你對預訂福田酒店可能出現嘅疑問！
哪些酒店最鄰近福田口岸，過關最方便？
深圳福田口岸希爾頓歡朋酒店係首選，距離福田口岸僅5分鐘步行路程。（Trip.com 預訂即享優惠）
另外，深圳福田皇崗城際酒店鄰近皇崗口岸（地鐵7號線直達皇崗村站），亦非常方便。（Trip.com 預訂即享優惠）
去山姆超市 (Sam’s Club) 掃貨住邊間酒店最好？
要去山姆福田店掃貨，住深圳福田香蜜湖亞朵酒店就最方便！酒店步行即可到達山姆，買完嘢可以即刻拎返酒店房，慳水慳力。（Trip.com 預訂即享優惠）
哪幾間酒店適合親子入住，有家庭房或兒童設施？
- 深圳憬居酒店：專為親子而設，有9款兒童主題房，部分房內有波波池、攀爬網。（Trip.com 預訂即享優惠）
- 深圳葵花酒店公寓：提供兩房一廳等複式套房，有廚房洗衣機，適合家庭長住。（Trip.com 預訂即享優惠）
- 金茂深圳JW萬豪酒店：特色行政客房可變身親子遊戲空間。（Trip.com 預訂即享優惠）
- 深圳福田口岸希爾頓歡朋酒店：提供親子房型。（Trip.com 預訂即享優惠）
有沒有適合情侶打卡的酒店推介 (有靚景浴缸、落地玻璃等)？
絕對有！情侶想浪漫一下，可以考慮：
- 深圳濱河時代ICON LAB艾墾酒店：部分房型有圓形景觀浴缸，可以邊浸浴邊睇日落夜景，超IG-able。（Trip.com 預訂即享優惠）
- 深圳文華東方酒店 / 深圳柏悦酒店：高層酒店，有無敵落地玻璃窗，盡覽城市天際線。（Trip.com 預訂即享優惠：文華東方酒店 | 柏悅酒店）
- 薈語酒店：大堂設計充滿綠意，清新脫俗，係打卡熱點。（Trip.com 預訂即享優惠）
如果預算有限，有冇人均$200左右又乾淨企理的選擇？
絕對有！想慳錢又住得舒服，可以考慮：
- 深圳福田皇崗城際酒店 (人均$183起): 2023年新開，地鐵站直達，仲送宵夜券。（Trip.com 預訂即享優惠）
- 秋果S酒店 (人均$193起): 房內有投影儀，CP值極高。（Trip.com 預訂即享優惠）
- 全季酒店 (人均$195起): 連鎖品牌，質素穩定，簡約乾淨。（Trip.com 預訂即享優惠）
福田交通及玩樂懶人包
訂好酒店，就要規劃行程！以下係福田區嘅交通同主要玩樂熱點，幫你輕鬆計劃行程。
主要交通口岸及站點
- 口岸：福田口岸、皇崗口岸。
- 主要地鐵樞紐站：購物公園站、崗廈站、福田站、會展中心站、車公廟站，呢幾個站幾乎覆蓋所有主要商場同景點。
- 高鐵站：福田高鐵站，方便前往內地其他城市。
延伸閱讀：【深圳地鐵攻略】路線圖/車費/支付/景點/商場一篇搞掂、港人北上必睇！
必逛大型商場及購物中心
- 星河COCO Park：集購物、餐飲、娛樂於一身，係年輕人嘅蒲點。
- One Avenue卓悅中心：超長嘅中央大街，分為東、西、北區，品牌齊全，打卡位多。
- 深業上城 (UpperHills)：結合商場、小鎮、公園嘅大型綜合體，無印良品酒店旗艦店就喺度。
- 皇庭廣場：連接會展中心，同樣係大型綜合購物中心
- KK ONE：位於下沙，潮流品牌同美食集中地。
特色景點及公園
- 荔枝公園：市中心嘅一片綠洲，係深圳歷史最悠久嘅公園之一，建築古色古香，適合散步。
- 深圳博物館：想了解深圳嘅歷史同發展，可以去參觀一下，免費入場。
- 深圳中心公園：位於華強北附近，係城市中心嘅一條綠色長廊，適合跑步同野餐。
熱門美食及按摩店推介
福田區嘅美食選擇多到數唔哂，各大商場入面都有齊海底撈、太二酸菜魚、探魚等網紅餐廳。想試地道嘢食，可以去水圍村、皇崗村等城中村尋寶。至於按摩，福田口岸同皇崗口岸附近有大量水療中心同按摩店，由平價到豪華任君選擇，行到攰去鬆一鬆就最正！
睇完以上超過20間深圳福田酒店的詳盡推介，無論你追求的是奢華享受、親子同樂、CP值先決，還是打卡體驗，相信都已經找到心水之選。福田區的酒店選擇豐儉由人，而且各有特色，希望這份攻略能助你輕鬆預訂，下次北上深圳玩得更盡興！
深圳貓編 Sally，來自香港嘅90後女生，在家係貓奴，在外係社畜。放假鍾意周圍去，發掘唔同嘅地方。自從疫情通關後已北上深圳超過100次，鍾意深圳夠近夠方便、又平又好多嘢食！週末假期會去深圳行街、按摩、食嘢，整理成旅遊攻略分享。希望大家以後去深圳，都會嚟搵深圳貓，記得貓咪伴你行！
發表留言